未見其店先聞其味!旺角越食越上癮柳州螺螄粉(有片)
2018-10-18

如果你行開旺角,聞到一陣陣酸酸嘅味道,順住依陣獨特嘅酸味行入去就啱啦!位於旺角嘅無麵不歡 - 中華私房粉麵,經常都大排長龍,餐廳主打中國各省嘅粉麵,短短幾個月已經喺同區開埋第二間分店。


老闆Wyan話因為自己本身好中意麵食,同時又覺得香港麵食選擇較少,咁啱有朋友都喺內地開咗類似嘅麵食餐廳,就跟佢地學師,所以味道夠哂正宗!


柳州螺獅粉($48)

螺獅粉之前喺淘寶熱賣,唔少人都買返包自己煮嚟試試。佢同臭豆腐同一道理,會有一種特別嘅味道,聞落酸酸地,但食落就出奇地好味。而碗麵會有依種獨特嘅味,就係因為加咗螺獅肉、廣西酸辣荀同酸豆角,酸酸辣辣好開胃,仲會越食越上癮添!麵用咗1.44mm嘅江西米粉,比我地平時食開嘅米線粗少少,比較有咬口。



重慶豌雜麵($38)

豌雜麵加入涪陵榨菜、肉未、脆豌豆、辣醬同麻醬去撈,食落辣辣地之餘有陣陣麻醬香氣, 好惹味!


酸辣貴州蕨根粉($38)

酸辣貴州蕨根粉味道同樣酸酸辣辣,特別在佢用上蕨根粉,麵質比較爽口,而且蕨根粉仲有豐富嘅維他命C同防癌功效。


順德卜卜蜆花甲粉絲($62)

想食清淡啲可以試下依款,放咗大量花甲、蜆同粟米滾個湯,味道好鮮甜。花甲大大隻,粉絲仲吸收哂湯嘅精華!



原創胡椒豬肚雞麵($68)

原創胡椒豬肚雞麵,湯底有豬肚、三黃雞、紅棗同枸杞,飲落好重胡椒味。連埋明火鐵鍋上,天氣涼涼地食就最啱!



更多【新店直擊】:
1. 抵食娘惹肉骨茶、叻沙 油麻地新開馬拉茶室
2. 將秘魯街頭小食帶到香港!中環新秘魯烤雞店
3. 首創黑白珍珠奶茶 台灣國宴級珍珠奶茶過江龍抵港!


湖南經典黑臭豆腐($28)、三味爽脆魚皮($48)

小食都有好多選擇,好似經典嘅黑臭豆腐,外脆內軟,配埋辣辣地嘅醬汁好惹味,如果汁可以再多啲就好啦!三味爽脆魚皮有酸辣、香辣同泡椒三種口味,魚皮好爽口,而且一啲腥味都冇。




麻椒豬爽肚($38)(左)、藤椒炸雞扒($36)(右)

豬肚爽口,又麻又香。藤椒炸雞扒炸到卜卜脆,一咬開有一陣藤椒香麻嘅味道喺口中散開,麻而不辣!


海苔多春魚($32)(左)、香酥排骨($30)(右)

中意食香口野就要叫下依兩樣,海苔多春魚連埋海苔碎一齊炸,又幾特別!香酥排骨炸到好鬆脆,調味又啱啱好,值得一試!


如果食得辣,一定要試埋店內自製嘅辣椒醬,一開始放入口唔會有咩感覺,但大約30秒後會感受到辣味慢慢喺喉嚨湧上嚟。另外溫馨一提,老闆為咗保持正宗味道,所有粉麵都唔可以自由配搭,想食正宗味道就要聽老闆建議!



無麵不歡 - 中華私房粉麵

地址: 旺角旺角道26號地舖


文、相、片:Yanica



關鍵字
螺獅粉
麵食
旺角
大熱
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
4天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12