期間限定麻辣全日早餐+芫荽蛋糕 紅磡複合式Cafe聯乘台灣辛香料品牌
2021-07-20

掛住台灣美食之餘仲掛住台灣嘅人情味?紅磡呢間台灣文青風格嘅咖啡店就同台灣辛香料品牌聯乘,推出期間限定嘅麻辣主題Menu。以「阿嬤欸辣灶咖」為題,有齊主食、甜點同飲品,分別以香麻醬、辣椒油等入饌,麻辣刺激同時香味層次豐富醇厚,驚喜十足!
 


鳥山。商號同台灣杜甲A-Ma最近合作推出六款聯名菜式及飲品,鳥山。商號由旅遊Blogger開設,集咖啡、旅遊、藝文等概念於一身,希望將台灣嘅生活氛圍同故事帶到香港。而杜甲A-Ma今年年初喺台北大稻埕開咗亞洲第一間以辣椒為主嘅辛香料概念體驗店,老闆由阿嬤養大,所以品牌就以阿嬤姓名為命名,推出一系列天然辣油、辣醬等調味料。
 


薟薑仔魯肉飯小拼盤($128)

薟薑仔係辣椒嘅台語,而魯肉飯就係其中一位店主喺宜蘭旅居嘅時候向小店偷師得嚟嘅地道食譜,選用豬五花手切成大細啱啱好、有油香又可以撈飯食嘅肉粒,加紅蔥頭、醬油膏等熬製至少五個鐘至入味濃稠。
 


加上杜甲A-Ma嘅香麻醬同五香蒜辣油,未食先聞到辛香料嘅香味,入口先辣後麻,撈埋珍珠米煮成Q彈嘅白飯好醒胃!拼盤仲會包括兩盤小菜唷。
 


阿嬤欸全日早餐($148)

台灣菜、辛香料同Cafe常見嘅All Day Breakfast加埋會係點?店主就發揮創意做出呢款阿嬤欸全日早餐,裡面有手工現打肉丸、甜不辣、辣香培根小吐司、沙拉菜、香草牛乳炒蛋,同迷你版嘅薟薑仔魯肉飯。
 


辣香培根小吐司上面係用煙肉、洋蔥、牛油、杜甲A-Ma香麻醬等炒成,鹹辣香麻,而用麥包烘成嘅吐司脆身有麥香,配搭啱啱好。手工現打肉丸比坊間一般肉丸鬆軟而不失彈牙,炒蛋就淋上杜甲A-Ma五香蒜辣油,麻辣有致。
 



「柊」- 泰式椰子芫荽芝士蛋糕($58)

兩款手工甜點都以杜甲A-Ma小川辣椒油入饌,呢款更用咗港台兩地最近嘅話題食材芫荽!白色蛋糕用上椰子、芫荽、香茅、Cream cheese製作,入口先食到椰子甜味,之後係芫荽嘅清香。而餅底加入小川辣椒油,鹹辣香口增加層次。
 

【新店直擊】文章:
1. 尖沙咀新開手工尼泊爾餃子店 五顏六色 餡料創新 橙白色海南雞momo
2. 色彩繽紛澳式Brunch Soho區新開打卡Cafe 必食UFO
3. 日賣100件!新鮮出爐手工鬆餅 網店進駐中環開兩層高Cafe

 

「松」 - 辣芒果摩卡生巧塔($58)

另一款撻就係生朱古力同愛文芒果嘅配搭,甜度得宜。朱古力撻皮同樣加入小川辣椒油,最後喺表面撒上杜甲A-Ma八味粉點綴,帶微微香辣更襯托出朱古力嘅香甜。
 


奶油辣妹($68)

兩杯飲品就用咗麻感更高嘅杜甲A-Ma大紅袍辣油,先係呢杯奶油辣妹以Cafe嘅House Blend Espresso為基底,淋上大紅袍辣油,再加上用牛奶新鮮打成嘅奶泡嚟模仿台式飲品常見嘅奶蓋。漸層賣相搶眼,飲落層次亦非常豐富,中烘焙咖啡嘅餅乾風味同辣油嘅微辣估唔到又幾夾,後韻帶甘。奶泡幼滑細緻,可以平衡返舌尖嘅麻感。
 


辣台妹($65)

辣台妹就以經典調酒Bloody Mary為靈感,以蕃茄、檸檬、辛香料等加上大紅袍辣油調配而成。杯邊沾上鹽粒,所以飲嘅時候鹹味會帶起飲品嘅酸辣同香氣,特別係蕃茄同檸檬嘅酸味自然,消暑一流。
 


餐廳裡更展出杜甲A-Ma品牌故事同多款產品,今次係品牌首次訪港,想了解更多唔好錯過機會

 


鳥山。商號 x 杜甲A-Ma 夏日「阿嬤欸辣灶咖」聯名菜單
日期:即日起至2021年8月15日
地址:紅磡蕪湖街111號蕪湖居地下C2號舖




文、相:Cathy.H

關鍵字
紅磡
期間限定
魯肉飯
咖啡
麻辣
杜甲A-Ma
鳥山。商號
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
2天前
榴槤Buffet真的很興奮~ 九龍區酒店7、8月限定榴槤盛宴
2021-06-30
投奔盛夏 7-8月份下午茶推介
2021-07-08
6月份好評餐廳十強
2021-07-06