有feel!灣仔不夜天 氣派酒店酒吧盡覽270度港島夜景(有片)
2019-10-22

傾偈飲嘢都好講氣氛,如果有個靚景望住,又有啲live band聽下,成個人當堂relax晒,好有feel!灣仔最近就有間新開嘅酒吧滿足晒呢啲要求啦,酒吧設喺酒店嘅頂層25樓,盡覽270度港島夜景,兼且仲有多杯特色cocktails!

呢間酒吧勁有氣派,有架私家lift搭上去㗎,成個場以Art Deco藝術裝飾風格為主調,連走廊同吧台嘅雲石都係人手逐塊逐塊咁拼上去!除咗有露台、包廂同VIP房外,仲有個天台㗎!

留意返呢度係夜晚先開始營業,每晚分設晚餐同深夜時段,晚餐時段(7pm - 9 :30pm)可選6道菜或8道菜餐,全部都係利用珍貴食材製作,好似鵝肝呀、烏魚子呀、燕窩等等!中西合璧,富有特色。

建議先食口感較輕怡嘅一口鵝肝撻,鵝肝球配Mascapone芝士,脆口中帶陣陣羶香。松露魚子醬配燉鮑魚則選以中式燉法南非鮑,再加上西式分子料理手法製成嘅松露魚子啫喱,一咬即爆油香。以陳年花雕酒釀製嘅醉雞蛋,呈半熟狀態,流心蛋汁中滲有陣陣酒香,不過就有啲蓋過咗烏魚子乾嘅味嘞。

主食奶油乾魚子撈麵非常creamy,細味嘅話仲食得出灑咗啲鹹蛋黃碎。

甜品梗係唔少得啦,CHOYA蝶矢黑糖梅酒燕窩、蜂巢蜜配香子蘭雪糕兩者可以混合一齊食,甜甜香香仲帶有幾分醉意。

至於8道菜嘅選擇,則多咗炸海藻墨魚同埋西班牙紅蝦配炸饅頭及芒果莎莎醬。前者以海藻代替麵包糠去炸,多咗份鮮味得嚟仲有種新鮮感;後者口感豐富,炸饅頭唔配煉奶改配酸甜嘅芒果莎莎醬,仲有,唔好miss咗個蝦頭啊,有膏㗎!

BTW,每樣嘅份量都唔算話好多,少食多滋味,三分醉七分飽就差唔多喇。

至於深夜時段(9:30pm – 2am),則設有現場音樂表演,同埋換上各款佐酒小食,好似黃金香脆雞翼、薯條、太子私房鴨肝油炒公仔麵等等。

特色cocktails當然先係呢度主角啦,張敬軒嘅fans必飲Pink Dahlia,呢個名加黑紗掛杯邊嘅造型,忠粉一定睇得出係以軒仔其中一隻暢銷大碟為靈感啦。以白酒做基底,加入接骨木花、櫻花、玫瑰等多種花香嘅Liquor,最後再噴上雪松Spray,無論係視覺味覺定嗅覺都得到大滿足,又香又甜,好啱女生飲,記住打卡啊。

Elixir(圖左)則以vodka做基底,加入鼠尾草同梳打等,係一杯幾清香嘅cocktail。想要補身啲養生啲嘅,有The Emperor(圖右),呢杯係Gin base,拌和人蔘同薑等等,初頭飲落澀澀地嘅人蔘味幾突出,但飲飲下就會喺喉嚨度feel到啲薑辣返出嚟啊。

睇到呢度,各位粉絲們冇理由唔知道,呢度係由張敬軒親自主理啊嘛?講多句,呢度同時仲可以做埋婚宴場地添呀。



The Crown
地址:灣仔皇后大道東373號英皇駿景酒店25樓

文:Kar
相、片:Tom Li


關鍵字
灣仔
酒吧
名人店
靚景
cocktails
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
5天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
2月份好評餐廳十強
2020-03-05
【隨時更新】最後倒數!即將結業的老字號及人氣小店
1天前