有機飼養未來牛 北海道米芝蓮燒肉店抵港(有片)
2017-08-02

牛魔王就開心啦,九龍又多咗間北海道過江龍,專食日式燒肉,主打嘅牛牛叫「未來牛」,嚟自北海道自家農場嘅,有機飼養嘅,冇打針、冇加抗生素。而呢間燒肉店喺北海道嘅總店,仲分別喺2012同2017年榮獲「米芝蓮車胎人美食推介」(北海道特別版),今次係舖頭嘅首間海外分店嚟呀。

「未來牛」來自北海道自家牧場

成隻牛嘅唔同部位都有得揀,甚至連牛舌、內臟都有,而想一次過試多幾款嘅,就可以叫個未來牛燒肉盛合,咁就會包咗4個部位,牛柳、牛腿肉、肩脊肉同牛肋肉。腿嘅口感會相對結實少少,而牛肋肉就最多脂肪、最腍身。食嗰陣,先用鹽加胡椒醃一醃,燒完之後就點wasabi。

當然,最後隻牛有幾好食,都取決於燒嘅技巧。同一般燒肉店一樣,自己的牛自己燒。喺度送少少貼士畀大家啦,社長話,燒第一面嘅時候,燒到有啲汁滲出嚟,就可以反轉。然後用比燒第一面少一半嘅時間去燒,肉質就係最理想。

至於A4和牛野原燒就比較特別,會由店員幫大家燒嘅。店員燒嗰陣,食客可以同時自己發一發蛋,和牛只係需要燒一面㗎咋,好快就會夾返上嚟,浸落生蛋黃汁度,沾均一齊食。牛肉喺口溶化之餘亦滲有絲絲蛋香。

除咗牛之外,豬同雞都有得食。豬係北海道五日巿豬嚟,豬肉味係幾濃;而雞就係岩手縣嘅。

五日巿豬肉眼

五日巿豬腩肉

雞腿肉

餐廳同時仲有60款清酒、燒酎、葡萄酒、威士忌等等嘅酒,送燒肉最啱。

「未來牛」其實係由日本和牛同荷蘭牛配種而成嘅,飼養嘅過程非常注重牛牛食嘅飼料、成長嘅環境,同埋牛牛嘅活動,希望盡量可以「以未來人類嘅健康」為出發點。



燒肉火蔵
地址:尖沙咀柯士甸道西1號圓方1樓1086號舖

文:Kar
相:Kar、Cathy


關鍵字
日本
燒肉
日式燒肉
九龍
圓方
牛肉
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
4天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12