最平$62!東京平價拉麵登陸荃灣 日本直送豚骨湯底(有片)
2019-07-22

拉麵控注意!又有一間日本拉麵過江龍嚟到香港:東京平價豚骨湯拉麵店今日進駐荃灣南豐紗廠啦,嚟到香港亦走親民價路線,最平$62就有一個拉麵套餐!價錢唔高但心思落足,豚骨湯底、叉燒、調味等從日本運到,亦有日本廚師長長駐,保證大家食到同日本店一樣嘅風味!
 


哲麵2006年喺日本東京創立,主打平價九州豚骨拉麵,喺日本大概用500円就有一碗拉麵。今日(22/7)起荃灣南豐紗廠分店開始試業,下星期一(29/7)正式開張。日本當地嘅廚師長大久保先生亦會長駐喺香港,部分員工亦去過日本總店訓練超過40日。
 


特盛霸王拉麵套餐($82)

最平嘅極上豚骨拉麵套餐$62就食到,而想食豪啲嘅話,配料最多最齊嘅特盛霸王拉麵套餐都係$82。湯底用豬骨、蔬菜再加豬背油熬煮10個鐘,達至濃厚香醇,Creamy而唔會有豬肉嘅臊味。叉燒、醬油、鹽、味噌、黑麻油等亦同樣嚟自日本,確保味道同日本出品一致。
 


叉燒鬆化甘香,而用九州白蛋製作嘅醬油蛋亦夠入味又有糖心效果。拉麵嘅麵係細麵,源於當初喺九州,豚骨拉麵主要係賣畀市場員工,幼麵可以快啲煮好又快啲食完。品牌保留呢個傳統選用直身幼麵,所以建議大家趁快食。想影相打卡嘅話就選擇高啲硬度,而且食完拉麵先食套餐當中嘅日式前菜、唐揚炸雞拼一口芝士,同甜品呀。
 


哲辛拉麵套餐($72)

餐廳只有一款豚骨湯底,但可以選擇鹽、醬油、味噌,亦可以揀呢款加咗辣肉醬嘅辣味拉麵,辣肉醬嘅辣度其實唔算好高,加埋白髮蔥絲一齊食夠惹味,而唔會蓋過豚骨醇香。
 


另外值得一提嘅係呢度亦有供應替玉,亦即係一份麵唔夠嘅話就可以再加一份拉麵。一方面當然為咗照顧各位大胃王,另一方面亦係因為細麵容易變腍,而加替玉亦可以調節湯底濃淡度。
 

更多【新店直擊】:
1. 太子新開藍白青花瓷主題Cafe 嘆大蒸籠早餐、黯然銷魂貝果
2. 牛魔王最愛 和牛+海鮮+清酒 日本六本木人氣牛排餐廳進駐山頂
3. 親民價食高質西餐!黃金海岸4000呎無敵海景餐廳 $62杯澳洲紅酒

  


日式餃子($38/5件)

除咗拉麵之外,呢度亦有供應丼飯、小食、前菜、沙律等。同日式拉麵最夾嘅當然係日式餃子啦,外脆內Juicy,簡單點醬油已經好好味。
 


蟹肉忌廉薯餅($38/2件)


炸魷魚圈($38/6件)

炸物亦相當有水準,蟹肉忌廉薯餅係日本店同台灣店熱賣項目之一,金黃香脆嘅薯餅裡面係Creamy蟹肉忌廉餡,略嫌蟹肉分量較少。而炸魷魚圈嘅炸漿香口而且薄身,魷魚彈牙口感討喜。
 



哲麵
地址:荃灣白田壩街45號南豐紗廠1樓110號舖




文:Cathy
相、片:Tom Li

關鍵字
荃灣
拉麵
豚骨拉麵
日本菜
哲麵
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
4天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
4月份好評餐廳十強
2020-05-07