等完又等，去曼谷必食嘅After You Dessert Cafe終於嚟到香港啦！首個期間限定聖誕市集位於銅鑼灣，會有招牌甜品蜜糖吐司食呀！仲有咖啡、曲奇等。想送禮就有多款品牌自家產品選擇，好似熱賣嘅班戟粉、香口嘅鹹蛋黃脆粒等，掛住泰國甜品嘅朋友要到啦。
 

原味蜜糖吐司（$68）

日式牛油吐司、蜂蜜糖漿都特別從泰國總部直送到港，口感特別鬆軟。即場烘脆再加上蜜糖糖漿、忌廉、杏仁粒同雪糕，暖笠笠嘅吐司同冰凍嘅雪糕一齊食口感刺激，而且蜜糖甜度適中，加埋吐司嘅牛油香啱啱好。
 

金莎朱古力蜜糖吐司（$78）

另一款金莎味選用泰國直送嘅榛子朱古力醬，香甜十足，再加榛子碎、金莎、忌廉、雪糕同朱古力醬。榛子香同朱古力嘅甜味本身就好夾，加埋榛子碎增加口感層次，甜魔必點。
 

聖誕老人曲奇餅（$58，雲呢拿雪糕+$10）

曲奇本身就有朱古力，建議加埋雲呢拿雪糕一齊食，味道更豐富。
 

（左）凍泰式奶茶（$38），（右）香濃朱古力特飲（$40/凍，$38/熱）

朱古力特飲係香港限定，口感幼滑而且有朱古力香，加埋忌廉同朱古力粉更香甜。而泰式奶茶就係正宗泰式口味，味道偏甜但真係幾香。
 

凍抹茶拿鐵（$40）

同樣係香港限定飲品，選用日本宇治抹茶粉，茶香清幽有淡淡回甘。
 

期間限定店以聖誕市集形式舉行，仲有唔少After You品牌，同嚟自世界各地、本地唔同牌子嘅嘢可以買走！
 

（左）Whole Wheat Pancake Mix（$58），（右）Pancake Mix（$58）

曼谷熱賣嘅全麥班戟粉同班戟粉同樣嚟到香港，打開裡面係預拌粉，只要自己加雞蛋、牛奶同牛油，攪勻就煎得，好方便！加佢哋嘅蜂蜜糖漿得，再加鮮果或者朱古力醬等配料亦得，得咗。
 

Shibuya Honey Syrup（$52）

Salted Egg Nuggets（$58）

近幾年好興嘅鹹蛋黃口味零食一樣有，呢款鹹蛋黃脆粒就有一粒粒裹滿鹹蛋黃嘅脆脆，仲有檸檬葉同辣椒乾增添香氣，惹味香脆，小心一粒接一粒咁好快食完！
 

Macadamia Meringue（$58）

輕盈脆口嘅蛋白餅當中加入夏威夷果仁，食落有果仁香同蛋白餅嘅甜味。
 

Raspberry Butter Cookie（$68）

Bite-size曲奇中間係覆盤子醬，味道酸甜，當下午茶或者零食都好啱。
 

After You Dessert Cafe 聖誕市集
日期：2020年12月19日至2021年1月3日（11:00-21:00）
地址：銅鑼灣登龍街 52 號

文、相：Cathy