晚巿重開 圍爐吃鍋嘆手切牛
2021-02-19

由12月等到2月,終於都等到晚巿重開。相信大家都好掛住圍爐嘅感覺,滾住食、食住傾。圍爐,未必係取暖,但一定要食靚牛!今次要介紹嘅兩間火鍋店,都有提供高質手切牛肉呢,更有多款坊間少見嘅配料。

打鑊甘火鍋串燒(北角) 

集火鍋加日式串燒於一身嘅呢間餐廳,有30幾種新鮮火鍋配料任君選擇,當中更有唔少係坊間少見嘅,例如各樣嘅豬雜雞雜咁,各位內臟腔有口福了。無論打邊爐定串燒,配酒當然最爽。餐廳備有多款酒精飲品,好似紅白酒、日本清酒、韓國燒酒同啤酒等。

藥膳牛骨湯

打邊爐嘅湯底至為重要,可以話係靈魂所在。呢度嘅藥膳牛骨湯,加入大量牛骨同埋十幾款藥材,每日熬足5、6個鐘, 師傅仲要特登炆香咗啲牛尾先再放落煲入面,令到湯底嘅牛味更香,藥材味雖濃但又唔會太過搶鏡,平衡唔錯。牛魔王同時叫埋本地手切騸古肥牛一齊食,就更加滿足,啖啖都浸沉喺牛肉香中。


雞切腹、新鮮雞子、新鮮雞腸

呢幾款雞內臟,全部都要預早採購,款款新鮮。雞切腹拼盤有齊雞心、雞肝同雞腎,帶有淡淡酒香。雞子嫩滑creamy,雞腸爽脆,冇乜腥味。


新鮮豬膶

除咗雞內臟,當然都唔少得豬內臟啦,新鮮豬膶經師傅特別醃製過後,辟走晒啲腥味之餘,仲都幾鮮甜,入口爽脆。


四寶丸

總有啲朋友仔打邊爐好鍾意食丸,咁就要試下呢度嘅四寶丸喇,包括有手打豬肉丸、蝦丸、鯪魚丸同墨魚丸,粒粒爽口彈牙,魚香肉鮮。


串燒

日式串燒總係香口嘅,仲要即叫即燒添,推介其中幾款人氣之選,鹽燒白鱔燒到層皮脆一脆,肉質有彈性;鹽燒雞翼孜然味香;燒牛脷係厚切版,饒有口感。


吞POT 雞煲火鍋.住家菜(旺角油麻地尖沙咀) 

擁有3間分店嘅呢間雞煲火鍋店,無論係雞煲、火鍋湯底定係配料,都有多款口味嘅選擇。想食辣嘅又得,要養顏嘅都得。除咗打邊爐之外,仲有唔少特色小食供應呢。其中,油麻地分店更成功得到廣大食客投票支持,成為今年嘅《優秀開飯熱店大賞》菜式組別中,火鍋店嘅得獎餐廳之一。

十全大寶丸

打邊爐總係要有幾粒丸淥下,唔使多,但要有。十全大寶丸包括有蟹粉墨魚丸、黑松露墨魚丸、黃金海膽黑墨丸、香煎鵝肝蝦丸同埋芝心牛丸,全部都係每日新鮮手打,松露香味突出,鵝肝蝦丸更係少見,值得一試。


自創爆芝響鈴

響鈴當然都係必備之配料,呢度供應嘅仲要係即叫即炸嘅自創爆芝響鈴。放落湯度2、3秒好夾返起喇,外層嘅腐皮啱啱好吸晒湯底嘅精華,而內裡仲係保持香脆嘅口感,仲有半溶嘅芝士夾喺中間,層次豐富。


極品本地手切牛頸脊

牛魔王當然不能沒有牛,喺眾多款牛嘅部位中,牛頸脊嘅脂肪較少而油花較香,牛肉味濃。


滋補螺片花膠雞煲
湯底可以話係一個火鍋嘅靈魂,而呢煲螺片花膠雞煲就相當足料,用鮮雞熬足一日,配埋花膠、螺片,啖啖濃郁鮮甜,建議咩都未淥之前,一滾就飲咗一碗先啊,滿滿嘅骨膠原,有養顏之效呢,女生實鍾意。


辣酒花螺雞煲
嗜辣嘅朋友仔可以試返個辣酒花螺雞煲,師傅毫不吝嗇咁重手落咗好多花椒八角同辣椒乾,而啲雞肉同花螺就索晒啲味啦,麻麻辣辣咁好香口,夠晒過癮。



心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異


關鍵字
北角
旺角
油麻地
尖沙咀
火鍋
雞煲
牛肉
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
1天前
情人節愛意滿瀉 甜蜜蜜堂食/外賣下午茶推介
2021-02-01
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
1月份好評餐廳十強
2021-02-09