日本過江龍迴轉壽司登陸佐敦 近百款選擇 新開業優惠$12極上拖羅壽司
2019-08-15

以後想食喺香港食迴轉壽司嘅話,又多個選擇喇!最新有間日本過江龍落戶佐敦,仲有近百款嘅傳統壽司同新潮創作壽司,價錢親民抵食,新開業期間,12蚊就食到件極上吞拿魚壽司啦!

壽司郎喺日本有35年歷史,喺日本同海外市場總共有超過530間分店!香港首間分店則選址佐敦,店內設有一直轉嘅迴轉壽司帶,客人見啱邊碟就拎邊碟,不過有時等極都未見到想食嘅出現,亦都可以透過iPad落單,然後餐廳會利用高速輸送帶直接將壽司送到,非常方便。

自問鍾意食壽司嘅你,諗住要食返幾多碟先?近百款選擇又真係難揀啲嘅。畀啲推介你哋啦。講到CP值最高嘅,一定係有新開張限定優惠嘅呢3款:

 極上大吞拿魚腩壽司 $12/件、赤蝦壽司  $12/2件、三文魚腩壽司 $17/2件

吞拿魚腩嘅油脂幾香,入口溶咗半;赤蝦肉鮮爽帶甜。

另外有唔少創意壽司,好似麻辣赤蝦壽司咁,就簡直迎合而家咁多人鍾意食麻辣嘢嘅趨勢,喺赤蝦面鋪上炸至香脆微焦嘅白蔥絲同脆香蔥味,不過就唔算好辣啦,輕輕地過下口癮。

芝士控都有壽司啱你喎,估唔到會有芝士壽司!極上鰻魚壽司同三文魚壽司上面,都加咗片偏軟身,而奶香味突出嘅卡門貝爾芝士。

但講到最吸睛,就應該係原條海鰻壽司喇!長到呢,見到都興奮。

草蝦天婦羅亦被製作成壽司,熟食仲有鹽味牛排壽司揀,配埋特製檸檬同鹽醬,就好似食緊一口牛肉飯咁,點wasabi又得、落七味粉食都得。

不過嚟到香港,當然要有返啲主場限定嘅壽司啦,全部都係香港人最愛嘅食材:

特大虎蝦天婦羅卷、生火腿卷、鰻魚卷、花之戀、三文魚卷、鮮蝦沙律卷、三文魚牛油果卷、鮮蝦牛油果卷

拉麵呀炸物呀呢度都有供應,而且仲有甜品添!特別推介北海道牛乳生布甸,奶香濃郁唔使講,重點係口感好軟滑啊,咁細樽兩啖就食完,有啲唔夠喉呀喂。

卡達拉娜亦係另一推介甜品,面層嘅焦糖燒得甜脆,底層軟滑,蛋香十足。

 抹茶瑞士卷


壽司郎
地址:佐敦彌敦道348號彌敦坊UG樓

文:Kar
相、片:Tom

關鍵字
佐敦
日本菜
壽司
過江龍
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
6天前
尖沙咀新商場開幕 過江龍餐廳一覽
2019-08-30
【2019中秋】最新人氣話題+送禮靚盒月餅集合
6天前
【蠔癡必看】生蠔海鮮的浪漫盛宴!
2019-08-27
台中人氣手工芋泥甜品登陸尖沙咀 必試招牌雙芋仙草奶凍、神仙奶
2019-09-03