以為罐頭一定係頹食？銅鑼灣呢間新餐廳一定可以打破你對罐頭嘅印象～日本罐頭酒吧品牌mr.kanso終於正式登陸香港！首店設於銅鑼灣耀華街，以享受罐頭與酒為主題，集合逾 40 款日本罐頭，包括肉類、海鮮、飯類、水果及甜點等。同日本店唔同嘅係，日本只會售賣現成罐頭，而香港店會將罐頭製成各式料理，將日本料理多層次嘅風味帶到香港！另外店內仲提供特調雞尾酒、日本清酒、威士忌及手工啤酒等。
蟹籽玉子燒 （$58）
餐廳最招牌玉子燒罐頭！品牌同京都 80 年玉子燒老字號品牌「吉田喜」合作， 研發出世界首個玉子燒罐頭，玉子燒以日本雞蛋及柴魚昆布高湯煎製。餐廳將呢個罐頭製成蟹籽玉子燒，烹調過程中先用火槍燒香玉子後加入蟹籽，玉子燒香甜口感綿密，配搭埋蟹籽味道更豐富。
西班牙海鮮飯（$148）
廚師特別額外添加鮮蝦及帶子，令到成個飯鮮味更濃厚，更能感受西班牙異國風情！
蛋黃醬大阪燒（$88）
罐頭內本身有兩件大阪燒，本身附有柴魚片、海苔粉以及大阪燒醬，將大阪名物嘅正宗風味還原。餐廳再添上更多柴魚片及新鮮椰菜，椰菜爽甜，令大阪燒更有層次感。
激辛咖喱牛肉烏冬（ $88）
由品牌獨家開發，為鍾意食辣嘅人士專門設計嘅咖喱罐頭。激辣咖喱配上額外添加嘅牛肉，適合搭配白飯或烏冬食，愛辣之人必試！
更多【新店直擊】： |
磨菇漢堡扒沙律（$88）
想食啲香口嘢，呢個磨菇漢堡扒沙律就啱晒～將漢堡扒加入芝士火腿再裹粉炸，熱辣辣外層香脆，漢堡肉味都好濃。
牛乳寒天洋梨奶凍（$88）
甜品一樣有得食！選用來自山形縣、逾百年歷史嘅「K&K NIPPON の果實」多汁洋梨，配合濃厚軟滑嘅牛乳寒天，味道好清新，唔會有罐頭果肉過甜嘅缺點。
mr.kanso （$128）
以店舖名 「mr.kanso」 命名嘅招牌雞尾酒，以「天之戶」純米大吟釀為基底，配以荔枝甜酒、小紅莓 汁及檸檬汁，再配襯接骨木花湯力水調製而成，帶有淡 淡荔枝香氣。
Tilantro（$128）
用最近至hit嘅芫茜製成嘅Cocktail，另外加入檸檬汁、蛋白等材料，一入口就感受到芫茜味喇！
除咗罐頭菜式，顧客仲可以買走現成罐頭，單買都禮盒裝都有，咁就自用送禮兩相宜～
地址: 銅鑼灣耀華街25號丹納中心地下1號舖
文、相: Yanica