上年興起一陣pancake熱潮，而呢股熱潮一直延續到今年都未散。日本過江龍Gram即將會喺銅鑼灣開多間旗艦店，兼且仲有幾款創新口味嘅pancake，例如日本和牛pancake同意大利黑松露醬虎蝦pancake等。

相信大家對佢哋3層高嘅招牌疏乎厘pancake一定唔會陌生，而新店更加推出變奏版，打破pancake熱食嘅傳統，變成凍食版，仲有得外賣拎走食！Cool Premium（只限外賣）夾住嘅忌廉好鬆軟，由新鮮奶油同自家製吉士醬混合而成，口感軟滑。

另一款都係得外賣先有嘅pancake，係日本和牛班戟。用上飛驒和牛，加埋荷蘭車打芝士、日式沙律汁、蔬菜蕃茄等，感覺更加豐富。

意大利黑松露醬虎蝦班戟，做正餐做主菜都絕對唔過份。虎蝦配搭日本本菇同新鮮土耳其無花果，而松露醬嘅香氣，為呢份pancake加咗唔少分，男生女生都啱食。

餐廳當然都會照顧甜魔們嘅，全新推出嘅焦糖蜜桃朱古力慕絲班戟，mousse又係朱古力，班戟又係朱古力味，甜上加甜，就連伴碟嘅蜜桃亦輕輕烤煮過。

新舖開張通常有著數，2月3、4兩日去銅鑼灣或尖沙咀店，每日頭50張單都有全單半價優惠呀！

Gram cafe & pancakes
地址：銅鑼灣謝斐道535號Tower 535地下1號舖
開業日期：2月3日（外賣菜式由2月5日起提供）

文：Kar
相、片：Tom Li