又有一間日本過江龍餐廳喇！今次呢間係人氣麵包咖啡店呀，食包都可以係一種高級享受呀喂。

話明麵包店，梗係有好多款包啦，但呢啲笨唔係普通嘅包，由麵粉、雞蛋到奶等等，大部分都係用日本原材料同爐具整㗎，每日廿幾款新鮮出爐嘅手工麵包，包括有招牌法式方包同埋香港店限定嘅櫻花鹽迷你法式方包、煙三文魚刁草法式鹹撻等等。

舖頭參考日本店嘅做法，喺一日唔同嘅時段都會有唔同嘅包點出爐，例如早餐同午餐時段就分別有法式同意式嘅三文治，好似法式煙三文魚三文治、風乾火腿意式三文治等等。

但講到最吸引嘅，一定係下午茶時段（3點鐘）先有嘅招牌法式吐司！

呢款吐司工序幾多下，首先早一日就要切好舖頭自製嘅方包，放入用日本雞蛋、鮮奶、糖、法國忌廉混合而成嘅蛋漿中間，吸收晒蛋漿之後就雪凍佢。喺上枱之前，再用鐵板以明火煎一煎然後放入焗爐焗15分鐘。

最後原個鐵板咁出爐，配埋意大利槐花蜂蜜一齊食，有糖香之餘亦有蛋香。麵包邊烘得脆脆der，但裡面嘅口感又好軟滑，甚至有啲似燉蛋嘅感覺。唔好睇少呢嚿吐司，一個人食晒都幾飽。BTW，每日限量30份咋！

係時候講下嘢飲，咖啡唔少得嘅。舖頭有3位專業咖啡師坐鎮，用香港烘焙嘅巴西、埃塞俄比亞同印尼嘅公平貿易咖啡豆，沖製獨家調配嘅House Blend Coffee。另外仲有啲由巴拿馬、肯亞等等地區生產嘅咖啡品種，單一產地添㗎。

期間限定嘅紫薯沙冰就應該係紫薯控嘅首選啦，成杯粉紫色咁超靚，飲落仲有啖啖紫薯蓉咁，好香甜，但唔好話我唔提你，幾飽肚㗎。

Bread, Espresso &
地址：尖沙咀漆咸道南115號達成商業大廈地下舖

文、相：Kar
 


開飯編輯推介：

1. 【專訪】日本人在香港 開餐廳最重要健康行先

2. 2月份好評餐廳十強

3. 2017亞洲50最佳餐廳 地區最佳餐廳全攻略

熱門文章推介：

1.  夠麻甩夠地道 元朗4間香口車仔麵店

2. 【二人前指南】港九新界齊最啱拍拖特色Cafe

3. 【熟食中心尋寶】禾稈冚珍珠 皇后街熟食市場

隨時接收最新資訊
讚好OpenRice專頁！