旅遊達人袁學謙 旺角再開茶飲分店 全港首創健康「豆腐堅果奶蓋」
2020-05-22

個個都鍾意飲「芝士奶蓋」,但個個都唔怕肥咩?近年大為流行嘅芝士奶蓋,主要成份有全脂奶/煉奶、糖、忌廉芝士等等,飲一杯都熱量爆燈……旅遊達人袁學謙(Benedict)有見及此,最近喺旺角開咗新嘅茶飲分店嘅同時,仲推出全港首創嘅豆腐堅果奶蓋,健康得嚟又有口感!

行實驗室風格嘅+-x茶,上年喺上環開設第一間舖,引入倫敦Matchæologist抹茶粉,製作出一系列嘅抹茶飲品而大受OL歡迎,今次進駐掃街旺區嘅旺角,就決定又搞下啲新意思,下星期一起(25/5)推出三款創新口味嘅豆腐堅果奶蓋飲品。

豆腐堅果奶蓋,一睇個名就知係用豆腐同堅果做出嚟嘅奶蓋,取代坊間一般用開嘅動物奶等食材,健康啲之餘,仲可以照顧埋一眾素食者嘅需要。先將堅果浸過熱水,變軟身後,再混合豆腐等其他材料攪勻而成。奶白色嘅「奶蓋」望落同一般奶蓋分別唔大,一樣咁順滑,但飲落就會飲到淡淡豆香,creamy得嚟仲有粒粒果仁咬得到,口感豐富。

呢排天氣悶熱,飲「青柑奇異果豆腐堅果奶蓋」就啱晒,加入新鮮青柑同奇異果製作,健康有營養,味道微酸清爽,好refreshing。

另一款健康口味「巨峰紅菜頭豆腐堅果奶蓋」,啖啖都係濃郁嘅巨峰提子果甜,而且仲有粒粒蘆薈,夠晒咬口。

最特別嘅係港式檸檬茶豆腐堅果奶蓋,檸檬同奶正常就唔可以溝埋一齊飲嘅,容易會攪肚痛,但今次呢個奶蓋就唔同啦,用豆腐整嘅,就唔怕啦~ Benedict話呢款奶蓋既有港式味道,又有啲玩味性質,似足佢哋舖頭實驗性質嘅風格呀。而茶底特地選用阿里山紅茶,陣陣茶香仲可以帶出檸檬嘅香味,同個奶蓋仲好夾添。

Benedict透露原本計劃喺台灣開分店㗎,連舖位都租埋,不過因為疫情出現就飛唔到過去搞……而旺角分店係佢哋品牌嘅第一間加盟店。如果大家熟路嘅,應該會記得呢個位上手同樣都係做茶飲店,但喺疫情底下捱唔住,於是出 $0 頂手費搵人接手。Benedict睇中呢個機會,加上業主仲肯減租,就抱住「有危便有機」嘅信念下喺「疫」巿開分店啦!



+-x茶 (旺角店)
地址:旺角廣華街1號仁安大廈地下24A號舖


文:Kar
相、片:Tom Li


關鍵字
旺角
茶飲店
開飯星探
健康
奶蓋
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
6天前
食豪啲啲 城中5間海鮮+肉扒父親節自助餐
2020-06-10
5月份好評餐廳十強
2020-06-05
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11