新開魔術手工啤酒吧 OnTap女伯爵全港獨家 + 過癮麻婆Mac&Cheese (有片)
2020-01-07

近年喺手工啤酒界內興起酸啤嘅潮流,其中有隻比利時酸啤「女伯爵」更係一眾beergeeks所追捧嘅,不過一直都只係得bottle飲。最近,有間新開嘅taproom居然有女伯爵on tap呀!!呢間taproom仲加入魔術元素,每晚都有魔術師駐場,又有酒飲又有魔術睇~

飲酒唔好空肚,梗係要叫返啲嘢食先啦~ 以下呢幾款新菜式都充滿特色:

 脷搭脷  $88

中西合璧嘅焗芝士牛脷牛脷酥,甜鹹有致,做法創新,估唔到又幾夾喎。

 即炸鮮薯片 配手製他他醬  $88

飲酒一係就食薯條,一係就食薯片,呢度嘅海鹽黑椒鮮炸薯片係新鮮炸出嚟㗎,即時將薯仔切片再炸,零舍脆口。他他醬則用新鮮紫洋蔥、德國酸青瓜同多種新鮮香草製作。

 東坡牛肋骨  $188

平時食開嘅東坡肉,通常都係比較肥嘅五花腩,而家改用牛肋骨代替,以慢火燘煮3個鐘,肉質粉嫩軟腍,亦盡吸八角、香葉等調味香料嘅味道。

 麻婆 Mac & Cheese  $128

講到最推介嘅一定係呢個焗芝士麻婆豆腐通心粉,芝士控最愛嘅mac & cheese變奏版,仲用成2種花椒、3種芝士、4種辣椒同榨菜去製作,鹹鹹地,麻比辣強,佐酒一流。

 (左) 雞絲掹藤(涼拌花椒麻醬雞絲芝麻麵)$108、(右) 青醬帶子大蝦菠菜麵 $138

呢兩款麵食都係選用一間有成70幾年歷史嘅本地麵廠所製嘅麵條,其中,菠菜麵仲要係用成十斤菠菜先至打到一斤麵,夠晒真材實料!

Beergeeks最期待嘅酒品,新店亮點一定係全港獨家嘅on tap女伯爵(Dichesse De Bourgogne)!帶有濃郁嘅果香味,酸味強烈,層次分明,甚至有少少飲緊紅酒嘅感覺。呢隻酒由比利時傳統黑啤酒二次發酵後,再放入葡萄酒業橡木桶中熟成幾個月而成。

另外,之前同大家介紹過嘅城釀「我城正在」啤酒系列,佢哋以啤酒作為載體,為呢個城巿進行紀錄。除咗指示、沉睡、逆流外,亦喺早前新推出第4款:閃耀,呢隻係一隻加入咗伯爵茶同裸麥釀製嘅porter,飲到最尾仲有啲紅茶韻香,樽身選配埋一張震撼嘅相片,香港人絕對要試。

同其他taproom唔同嘅係,呢度仲多咗魔術嘅元素,每枱都放咗啲小型解鎖玩具喺枱面,大家可以邊飲邊玩,挑戰唔同難度成功係幾有滿足感。每晚仲會有魔術師駐場,輪流去每枱度同客人互動,大玩近距離魔術,係幾開心仔呀。夾啱日子嘅話,每個月定期都有魔術師喺舞台上表演添,氣氛一流。


HANDS - Craft Beer & Magic 
地址:太子大南街27-31號富威閣地下1-2號舖

文、相、片:Kar


關鍵字
太子
手工啤酒
芝士
taproom
酒吧
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
1天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
2月份好評餐廳十強
2020-03-05
【3月生日】優惠情報!有折扣仲有生蠔送
2020-03-03