台灣茶飲嘅熱潮真係擋唔住，唔止一間間茶飲店係咁開，就連歌手傅珮嘉（Maggie）早前亦特地去咗台灣走訪多間茶商，品茶求學問，仲帶咗幾款精品茶葉返嚟，而家喺佢間台式餐廳度有得飲啦。btw餐廳最近仲有新菜式，魯肉飯加埋海膽添呀！

餐廳本身嘅魯肉飯已經好香口，而家仲喺原有班底（香菇、魯肉）之上再加埋海膽，唔止一款海膽喎，一嚟嚟兩款！分別係加拿大海膽同埋北海道馬糞海膽，兩款嘅色澤都鮮橙黃，賣相吸引。加上海膽本身味帶鮮甜，混埋惹味嘅魯肉飯，鹹香中滲甜味，層次豐富。很想吃吧？但每日只係限量10碗咋，仲要只係得銅鑼灣分店先有。

台南有道人氣小食，叫棺材板，即係炸多士然後再挖空中間位置，加入其他食材同醬汁。依家舖頭都有得食啦。有兩款醬汁，一款係濃濃嘅日式咖喱嫩雞，一款係日式白汁海鮮。多士炸得好香脆，有少少似炸饅頭嘅feel，就算醮咗汁都唔會變腍。切開一格格夾埋雞肉或者海鮮一齊食，係幾夾。留意返係得下午茶時段 (2:30-5:30pm)供應。

至於重點推出嘅5款茶飲，喺台灣叫tea espresso，茶底都係Maggie去台灣拜訪好多間知名同歷史悠久嘅茶商後選購返嚟嘅。佢透露喺其中一間度，仲一次過試咗15款茶，並且學多咗好多有關茶葉嘅學問。呢5款茶飲，除咗有用基本嘅紅茶底外，另外引入埋烏龍茶底同綠茶底。綠茶底幾清香，兼且有大馬士革玫瑰嘅香氣。

5款入面首推土鳳梨茶王，一飲落烏龍茶香即刻搶閘而出，然後仲可以吸啜到大量嘅菠蘿果肉，酸酸甜甜，愈飲愈醒胃。

至於超級水果茶就夠晒清甜，果香味突出；玫瑰纖檸冰茶亦有陣陣嘅玫瑰幽香，片片花瓣散落喺茶面，應該輕易得到各位女生嘅歡心。

 香芋拿鐵、芝士綠妍

三星台菜食堂
地址：銅鑼灣駱克道459-461號 The L. Square 21樓

文、相、片：Kar