新店上場!葵廣5間掃街推介
2017-10-16

葵涌廣場一向多食店,最開心嘅就係附近啲學生、居民,經常平價食好東西,正!葵廣呢排又新開幾間小食店,有港式有中式有日式,勁多選擇!開飯仔都忍不住衝咗去葵廣試食,速睇葵廣最新5間新店先!

超巨大8cm炸彈章魚燒 金坂瀛

舖頭原本主打鐵板燒炒麵、串燒,但佢哋最新引入超巨大炸彈章魚燒,比起一般嘅章魚小丸子大8倍,食一粒都飽晒,經過嘅途人都不禁嘩然!

呢個拳頭咁大粒嘅炸彈燒,入面有10款餡料:章魚、蝦、蜆肉、脆皮腸、原粒鵪鶉蛋、煙肉、雞髀菇、粟米、椰菜及蘿蔔絲,勁豐富!

所有材料撈勻之後用日本醬油醃製,然後混以粉漿整成炸彈燒。

如果想更滋味,可加錢要埋自選配料,最受客人歡迎嘅有明太子沙律、芝士蟹子。

鍾意食芝士嘅就一定要試呢個火炙芝士,喺炸彈燒上面放一塊車打芝士,然後喺客人面前用火槍燒,令芝士融化,視覺效果一流。

另有鐵板燒炒麵,推介皇帝蟹極上豚肉卷配日式燒汁炒麵,平價又飽肚,價錢為$35/份。

$25勁飽肚麻辣麵 三和

葵廣最新麻辣店應該係呢間開咗約一個月嘅三和。先從酸辣粉、幼麵揀一款,再配麻辣手撕雞、豬耳、雞腎、豬脷、結頭菜及黃豆,店員再加入秘製辣醬,撈勻就搞掂!

秘製辣醬係用四川辣椒、芝麻、花生等製成,麻辣味好重。配料分量都幾多,而且都幾入味,食完個嘴會有種麻痺感,辣味正宗。


4式咖喱set 友好嘢食

咖喱予人感覺好辣,但其實咖喱都有分不同辣度。呢間小店就可以畀食客們試到自己最啱食嘅辣度。一個咖喱拼盤,可食到咖喱、肉及小食。

咖喱有4款選擇,按照辣度由小至大排列嘅有:港式咖喱、泰式紅咖喱、泰式青咖喱、印度咖喱;肉類可選香草焗雞髀肉、香煎牛柳肉粒、泰式豬頸肉及黑椒煙鴨胸,當中最受歡迎嘅係即叫即煎嘅牛柳粒!至於小食則有香蔥薄餅、黃金芝士棒、香草飯糰及蒜蓉包。學生更可以將小食轉為迷你碟頭飯/烏冬,夠飽肚。

好有肉感嘅牛柳粒,配以重口味嘅咖喱,食落juicy又夠辣。

怕辣嘅人都唔使驚,小食會跟送自家製蘋果醬,能減輕咖喱嘅辣勁架!

門口好大塊餐牌,夠搶眼,簡單易明。

神奇的雪糕熱狗 KINPAN

雖然位處巷仔之中,但賣嘅小食、飲品都咁有gimmick,點會無客人呢?睇下餐牌,樣樣食物、飲品都有特別名稱,例如流行經典50年、重口味、到紫一遊、逃避時間、不要上班、不要長大,好搞鬼。

舖頭皇牌item就係由北海道3.6牛乳雪糕配搭熱狗而成嘅KINPAN,好特別!喺熱狗外層搽上蜜糖再烘焗,再唧上冰凍雪糕,冷熱交融,好滋味!

另有「小鮮肉」嘅芝士熱狗,將熱融芝士淋上熱狗,classic又好味。

飲品方面,呢兩杯綠茶沙冰、士多啤梨沙冰都好eye-catching,上面啲配料可由客人自己揀架,有朱古力、棉花糖、彩針等等!

我就最鍾意呢杯紫薯沙冰「求學都是求分數」,飲落比起一般紫薯沙冰較為濃味,而且食到有紫薯蓉,好飲!

行住食嘅麻辣火鍋 真好味麻辣燙

呢個主打麻辣嘅小店,特別設置咗一大個配料櫃,放滿三四十款配料!每串配料大約$6-$8蚊左右,買夠6串仲送一串添!店員推介豬血糕、福洲魚丸、手工香芋貢丸,款式特別啲,亦吸味啲!如果想飽肚啲,更可加錢配埋米粉、出前一丁等粉麵。

首先客人揀選配料,然後店員將配料煮熟,再加入麻辣湯。麻辣湯由豬骨、四川辣椒熬成,設有3種辣度。開飯仔就揀咗牛柏葉、豆腐配小辣湯,配料好吸味,好辣,湯水亦非常辛辣,嗜辣之人應該會勁鍾意。



文:Joy

關鍵字
葵廣
葵涌廣場
章魚燒
咖喱
沙冰
紫薯
綠茶
麻辣
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
更多
收起
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
2020-07-31
全城抗炎!送上門懶人煮食包及套餐大合集2.0 花膠燉湯/火鍋/鐵板燒
1天前
全城抗炎!北角酒店最新應變 自助餐都有得外賣?
2020-07-17
好人好店! 餐廳全日禁堂食 民間自發開放午膳空間地點一覽
2020-07-29