文青手寫字+酒店級輕食 必食黑松露蟹肉多士 荔枝角新小白屋Cafe
2021-04-12

想喺鬧市當中搵個安靜啲地方嘆杯咖啡?呢間藏身於饒宗頤文化館當中嘅咖啡店就啱晒喇,山腰上佈滿藤蔓嘅小白屋好有後花園Feel,而且枱面寫上唔少打氣字句!食物亦有心思,由前酒店行政總廚主理,意粉、多士等輕食都食得出心機,咖啡豆亦選用本地烘焙,有水準。
 


coffeeflow位於饒宗頤文化館G座,由美孚港鐵站經行人天橋行過去都係10分鐘左右嘅路程。咖啡店亦特別請本地書法家喺餐廳唔同地方寫上打氣字句,好似「你可以有動力滿滿的日子,也可以有需要力量的時刻」,「堅持自己相信的事情,相信自己堅持的一切」等,希望大家嚟到唔單止打卡或者醫肚,心靈上亦可以得到滿足。Cafe係家庭式經營,主廚係半島酒店前行政主廚,入行超過40年,醬汁同用料等都好有考究!
 


Lobster Roll w/ Salad($88)

熱賣No.1係呢款龍蝦包,主角越南小龍蝦肉質彈牙味道鮮甜,配搭秘製沙律醬。醬汁經過改良,用新鮮檸檬汁調配,食落香甜微酸,唔嗆喉又有開胃效果。麵包就選用口感鬆軟嘅熱狗包,加上沙律整體相當清新。
 


Black Truffle Crab Dip w/ Toasts($88)

呢款黑松露蟹肉醬多士就好啱Share食,沾醬主要係黑松露醬、蟹肉,同沙律醬,入口先有濃郁嘅黑松露香氣,之後就係蟹肉嘅鮮味同鹹香,配多士食就啱啱好。多士係用法包即點即切再焗熱,口感好似餅乾咁脆卜卜!
 


Lobster Pasta w/ Cream Sauce($98)

意粉嘅忌廉汁同樣係大廚秘方,比一般坊間食到嘅白汁更清爽,而且加入龍蝦汁烹調,食落鮮甜又唔膩。龍蝦同樣選用越南產小龍蝦,加上爽嫩嘅露筍,口感層次豐富。
 


Blueberry Cheese Cake($40)

甜品就嚟自本地嘅烘焙工場,每日新鮮製作再喺一大早送到Cafe,口味日日唔同。Blueberry Cheese Cake就係藍莓醬配搭經典紐約芝士蛋糕,口感結實軟滑,芝士香濃郁。
 


Tiramisu Cheese Cake($40)

拍攝當日另一款推介係Tiramisu Cheese Cake,口感比經典芝士蛋糕軟棉,中間有吸滿咖啡嘅手指餅,增添口感同味道層次。
 

更多【新店直擊】:
1. 【最平$298最貴$938】佐敦新開日式和牛燒肉放題 獨家引入鹿兒島小田和牛
2. 自家原創焦糖酥皮曲奇Pookie、流心抹茶口味 香港人氣曲奇網店實體店登陸大坑
3. 煙燻+鐵板菜式有驚喜 九龍城新開日式居酒屋 招牌煙燻五重芝士Pizza

 

Dirty($40)

House Blend選用本地烘焙咖啡豆,糅合巴西、哥倫比亞同印尼三個產地嘅豆,味道平衡。推介大家嚟飲Dirty,中深烘焙嘅咖啡油脂夠厚身,可以品嘗到熱咖啡同凍牛奶帶嚟嘅唔同層次。咖啡聞起嚟帶蜂蜜香氣,初入口會有堅果香,放涼後酸感提升,後韻係黑朱古力嘅甜味。
 


Mocha(Hot $38 / Iced $40)

另一推介係Mocha,選味道濃郁嘅高可可含量朱古力沖調,減少甜度,一嚟無咁膩,二嚟亦唔會蓋過咖啡香。所以呢杯Mocha聞起嚟有黑朱古力甜中帶微酸嘅香氣,飲落會同時品嘗到咖啡嘅甘香同朱古力嘅甜味。
 


Green Tea Latte(Hot $40 / Iced $45)

凍飲用特別嘅鑽石型玻璃杯奉上,以日本綠茶粉沖調,甜味比較突出,飲完喉嚨會有一絲回甘。表面加上一層手打奶泡,口感非常輕柔綿密而且唔會太甜,令Latte味道同口感更富層次。
 


coffeeflow呢個店名當中嘅flow係指心流,希望小店可以畀個空間大家去享受同沉浸其中,變得更愉悅同開朗。呢度之後仲會舉辦唔同活動,嚟緊就有本地書法家嘅英文書法工作坊,之後亦計劃緊舉辦咖啡體驗班,亦希望夜晚可以喺戶外搞Busking,想參加嘅話記得留意啦!
 



coffeeflow
地址:荔枝角青山道800號饒宗頤文化館G座地下1及3號舖




文、相:Cathy

關鍵字
美孚
荔枝角
饒宗頤文化館
cafe
咖啡
意粉
龍蝦包
coffeeflow
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【2021生日優惠】持續更新!8月壽星免費嘆麻辣串串鍋
3天前
【隨時更新】零食速報 每周新款零食、酒品點評
7天前
【恭喜張家朗、何詩蓓】多間餐廳立即推出限時優惠一覽
2021-07-28
投奔盛夏 7-8月份下午茶推介
2021-07-08
日賣100件!新鮮出爐手工鬆餅 網店進駐中環開兩層高Cafe
2021-07-15