鍾意掃街嘅朋友仔又有新選擇啦，除咗章魚燒、雞蛋仔之類，而家仲可以揀三文魚！

旺角同尖沙咀開咗兩間主打三文魚小食嘅小店，三文魚由挪威直送，餐廳喺當地仲有自家養殖場同加工廠。喺新開業期間，尖咀店所有熟食喺指定時段（15:00-19:00）都只係賣$10份咋！

 鹹蛋黃脆皮三文魚

 芥末脆皮三文魚

大部分人都鍾意食脆口嘢，脆皮三文魚就啱晒，原味以外，有麻辣、鹹蛋黃、芥末、香檳橙、椒鹽同麻婆豆腐等口味選擇。其中鹹蛋黃嗰款，仲係即席炒香鹹蛋黃再同炸好嘅三文魚兜幾兜，未食已經聞到香味。三文魚外層炸至香脆，裡面粉橙色嘅肉質依然細嫩。

呢度嘅魚蛋，口感比較實淨，唔屬於彈牙類但就有淡淡魚肉香，原來係以三文魚同鱈魚混製而成，面頭舖埋芝士，經火槍燒至半溶狀態，趁熱食會有微微拉絲效果！

想飽肚少少甚至當正餐食嘅，有維京漢堡。中間件三文魚扒好有份量下啊！

其他小食包括有煙三文魚溏心蛋同煙三文魚多士等。店內同時都有多款挪威食品，好似枝裝魚子醬、朱古力同魚油等發售。

Norway House
地址：尖沙咀漆咸道南33-35號友聯大廈地下6號舖

文、相、片：Kar