疫情持續，大家都盡量減少外出，留家抗疫，落街買餸最好就一次過買多幾日嘅食材啦。開飯仔繼續請嚟營養師Eacy Nutrition分享儲糧秘訣，應該買邊類食物，同點樣延長保鮮期啦，等大家有足夠嘅儲備！

一星期儲糧秘訣

蔬菜篇：

1. 葉菜類、西蘭花、椰菜，只要抹走多餘水分，摘掉黃葉，再用紙巾或報紙包實放入膠袋，然後放入雪櫃，一般可保存4-5日。
2. 番茄可放喺室溫保存，成熟時先放入雪櫃，一般可保存4-5日。
3. 菇類、三色椒、瓜類（如青瓜、翠肉瓜、南瓜）保存前切勿清洗，直接連包裝放入雪櫃可以保存1星期。

水果篇：

1. 較厚皮嘅生果有較長保鮮期，例如：橙、西柚、蘋果、番石榴、木瓜等，放入雪櫃可以保存1星期。
2. 可選購未成熟嘅綠色皮香蕉，放喺室溫等變黃。亦可用保鮮紙包裹蒂頭，減慢成熟速度，但避免放入雪櫃，因為會令香蕉皮變黑。
3. 提子、士多啤梨要先將壞嘅部分除去，再用紙巾吸乾多餘水分；但注意切勿清洗，直接放入雪櫃保存，進食前才用水清洗，可以保存3-5天。
4. 建議購買3-5款水果，以攝取多元化營養素。

蛋白質篇：

1. 急凍肉類有更長保存期，而且急凍同新鮮嘅肉類或魚類，兩者營養成分唔會相差太大。可購買急凍三文魚柳、急凍海鮮、急凍豬扒等。
2. 如果將新鮮肉類放入冰箱，建議預先分切成每次食用分量，洗淨抹乾，放入食物盒貯存，咁就可以避免肉類再次急凍。
3. 紅腰豆、鷹咀豆含有豐富蛋白質同維他命B，係優質蛋白質來源之一，而且保存期長達一年。
4. 罐頭類可選購茄汁沙甸魚、吞拿魚，係含有豐富奧米加三脂肪酸嘅選擇。

五穀類：

1. 米、意粉、米粉、非油炸即食麵。
2. 粟米、薯仔、番薯都係好嘅選擇，可代替粉麵飯。薯仔同番薯要放喺室溫地方保存，避免曬到太陽。
3. 粟米片、急凍bagel可以做早餐，而且保存期較長。

抗疫小百科（預防篇） 營養師建議7大營養素+餐單推介 增強免疫力：（按此）
抗疫小百科（在家飲食篇）營養師給輕微微症狀患者的餐飲建議 4個方向攝取營養+餐單：（按此）