投奔盛夏 7-8月份下午茶推介
2021-07-08
踏入炎熱嘅7、8月,想出街同朋友聚吓又唔想留喺戶外,搵個有冷氣嘅地方嘆返個afternoon tea就最爽!今個暑假,唔少酒店餐廳都相繼推出夏日下午茶,無論係冰火主題、卡通系列、花果主題同百食不厭嘅抺茶系列都有,食完真係透心涼~

冰火甜品下午茶 普慶餐廳  

甜魔必試嘅甜品主題下午茶!以冰火甜品配搭作主題,最開心當然係可以同時任食Mövenpick同Häagen-Dazs雪糕啦,另外仲有多款暖笠笠甜品包括棉花糖香蕉布丁、朱古力核桃布朗尼、抹茶心太軟、烤香梨批等輪流供應。即造甜品專區亦夠晒誠意,有專人即場製作日式梳乎里班戟同香脆窩夫,配埋冰凍雪糕食,一暖一冷,係享受呀~餐廳亦有準備咗幾款鹹食主菜畀大家揀,咁就無咁易膩喇。

供應時間: 即日起至8月31日(只限星期一至五,公眾假期除外),下午3時15分至5時15分價錢: 每位$148起

比得兔夏日奇緣下午茶 Lion Rock 

呢間型格餐廳酒吧同近排上映嘅電影《比得兔2:走佬日記》聯乘推出夏日奇緣下午茶,所有鹹甜點心都以故事同角色為靈感,好似走咗入電影世界咁,Fans一定唔可以錯過。鹹點方面有由蝦多士變奏而成嘅炸芝麻三文魚手指伴沙律醬、香脆惹味嘅燴鴨肉酥盒;甜點當然必試香橙甘筍芝士蛋糕伴朱古力比得兔同多款蛋糕。兩位或以上仲會送童話曲奇。下午茶有埋外賣同外送服務,就算安坐家中都可以享用到四層架下午茶!

供應時間: 即日起至9月30日,下午2時半至5時價錢: $270一位 / $508兩位

白桃海膽蜜語下午茶 PitStop

海膽同白桃嘅配搭你食過未?呢個下午茶以鮮甜日本海膽同清爽白桃為主題,包括日本海膽啫喱海鮮杯、日本海膽龍蝦酥盒、日本海膽意大利辣肉腸薄餅等,滿滿海膽鮮味喺口中爆發!食完濃厚嘅海膽想清吓味蕾,有多款日本白桃甜點選擇,白桃士多啤梨慕絲蛋糕融合白桃同士多啤梨嘅自然果味,味道清甜有驚喜,另外仲有鮮白桃佐白酒寒天、白桃芒果撻、白桃雲呢拿奶凍同白桃鮮忌廉蛋糕卷,白桃控必試。

供應時間: 即日起至9月30日,下午3時至5時30分價錢: $628兩位

幽香抹茶下午茶 星幕 

由於香港地實在太多抹茶控,所以抹茶主題嘅下午茶係永遠都咁有人氣!今次呢間餐廳就同護膚品牌合作推出幽香抹茶下午茶,所有甜鹹點都以京都宇治山政小山園抹茶粉入饌,味醇甘香。有五款甜品同五款鹹點,甜品有抹茶英式鬆餅,香脆鬆化,牛油同抹茶香氣恰到好處,另外仲有抹茶雙重芝士蛋糕同抹茶焦糖雞蛋布甸等。鹹點都幾有特色,如脆炸大蝦配抹茶醬,抹茶醬有助中和炸物油膩感,焗三文魚配抹茶忌廉汁同抹茶蟹肉醬全麥多士都比想像中夾!凡享用Tea set嘅朋友都可以獲贈品牌價值高達HK$2,953之禮遇添~

供應時間: 即日起至9月30日,下午3時至5時
價錢: 星期一至五HK$288(兩位用),星期六、日及公眾假期HK$308(兩位用),另加一服務費

夏日「茉」香「果」園下午茶套餐  灣景廳 


想輕盈啲,食返個以花同鮮果為主題嘅下午茶就啱晒!夏日「茉」香「果」園下午茶套餐嘅點心,以清香淡雅嘅茉莉花同多款鮮果製成,包括三文魚帶子芒果他他、和牛面頰肉配蘋果同焦糖洋蔥、百花炸蟹鉗配茉莉花蛋黃醬等,甜品有茉莉花抹茶慕絲蛋糕、茉莉花西瓜果凍、芒果芝士卷,食完一啲罪惡感都無。

供應時間: 即日起至8月31日,逢星期六、日及公眾假期下午2時30分至5時30分供應
價錢: 198一位 / $388兩位


文:Yanica


關鍵字
下午茶
抹茶
甜品
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
4天前
投奔盛夏 7-8月份下午茶推介
2021-07-08
6月份好評餐廳十強
2021-07-06