手工啤抵飲!銅鑼灣大廈頂樓新Chill點 必食爆多肉汁和牛漢堡
2018-10-09

飲酒、食飯,除咗食物質素之外,環境氣氛都好重要。最近就有間新餐廳,位於銅鑼灣一幢新新地嘅大廈頂樓,景觀開揚之餘,仲可以走埋出去室外吹住風嚟chill返兩杯,都咪話唔爽!而且價錢仲算幾親民添。

5安士和牛漢堡配薯角係餐廳嘅主打菜式,呢個burger好多層好多料啊!底面麵包軟熟,先搽上牛油同秘製醬料後,再放上生菜、蕃茄、煎香咗嘅和牛堡,仲用熱溶芝士包住、洋蔥圈同洋蔥醬,有嚿菠蘿添~ 選用嚟自日本同澳洲嘅全和牛堡,好鬼多肉汁,洋蔥辣辣地而菠蘿又甜甜地,中和返牛嘅膩度。

主食方面,選擇暫時唔算好多,而且耐唔耐就會轉一次,但都會每日有一款素食提供,照顧各位素食者嘅需要。好似呢期供應緊嘅就係烤茄子彩椒配羅勒香蒜螺絲粉,賣相sharp醒,食落羅勒等香料嘅味道相當突出。素食,都唔一定係好寡嘅。

至於小食,全部都好啱送酒!要特別推介烘烤雞泡魚乾同炸魚薯條!前者一條條煙煙韌韌好有咬口,鹹鹹香香咁係會令人好有衝動,食完一條又一條。而後者嘅炸魚炸得香脆,內裡嘅魚肉依然滑溜,連個沙律醬都係自家調製。

嚟得梗係要飲返兩杯啦,呢度嘅酒水選擇相對算多,德國生啤、本地手工啤、cocktail同紅白酒等都有。本地手工啤就全部都係嚟自麥子嘅,飲開嘅啤迷對於佢哋嘅鹽田、桂圓應該唔會陌生,咁有冇試過期間限定款式嘅琥珀風情?係隻麥芽同果香味都平衡嘅amber ale嚟,聽講話飲埋十月就冇啦。講開又講,呢度嘅手工啤酒喺餐飲界嚟講算幾抵飲,平時出去飲一杯通常七八十蚊都走唔甩,呢度$60都唔使,如果做咗會員仲只係$48杯咋。

唔好酒嘅話,都有啲無酒精飲品。其中一杯應該會係好多女生都大愛嘅牛油果咖啡特飲。將成個牛油果混入咖啡度一齊沖泡,creamy得嚟又香口。

 受訪者提供相片

銅鑼灣附近office打工仔lunch上嚟食個飯叉個電固然爽,空間感大,地方闊落,而且成個木系為主嘅場就畀到人一個悠閒嘅感覺。但入夜後又有另一個feel,暗暗地嘅燈光幾啱三幾個好朋友喺度chill下講下秘密。另外,呢度時不時就會搞下各類嘅live band呀drama呀等等唔同嘅文藝活動㗎。

過客
地址:銅鑼灣渣甸街66號Aura on Pennington22樓全層

文:Kar
相、片:Tom Li

關鍵字
銅鑼灣
手工啤酒
漢堡
burger
咖啡
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22