我要食好「西」! 邪惡版西多士 Level 1-9 你食到邊級?
2016-09-23

聞說,香港人總係愈邪惡嘅嘢,就愈鍾意食。而喺「邪惡食物榜」入面,西多士應該長期都佔一個席位。普普通通嘅麵包,淋上蛋漿再炸到金黃色,脆卜卜,一嚿牛油、一pat花生醬、一樽楓糖,加埋一齊就一啲都唔普通喇!講起又有啲想食,不過今次想同大家介紹9款另類口味嘅西多,係更加邪惡嘅!準備好接受挑戰未先?

1級邪惡:咖央西多士   維記咖啡粉麵

圖:yemenikwannoel.ho.1297

維記賣嘅係咖央西多,同平時炸到金黃色嘅西多有少少唔同,感覺似係香煎麵包多啲。麵包中間夾住香香甜甜嘅咖央醬,整完出嚟蛋香味重,而麵包亦相對軟身。

2級邪惡:西多士   瑞記咖啡


圖:noknokyuenVizT

瑞記嘅西多士,喺邪惡等級嚟講已經相對較低,因為佢冇平時西多士咁炸,只係加咗蛋漿喺麵包度煎,感覺上冇咁熱氣嘅,而且仲好有蛋香味。而邪惡點就在於淋喺面頭嘅大量煉奶嘞,每塊包都浸淫喺煉奶當中,好甜。

3級邪惡:蕃薯西多士    大蕃薯


圖:Candy choi1026natfoodiary_

睇餐廳名就知呢度主打蕃薯,大部分嘅菜式都混入咗蕃薯去整。西多當然都唔例外,中間嘅花生醬換咗做蕃薯蓉,就算唔加奶同糖,本身都已經好夠甜。佢嘅邪惡,除咗嚟自甜度,更加係佢嘅熱量呀,蕃薯食得多都好滯㗎。

4級邪惡:沙嗲牛肉西多士   樂園


圖:lemontealam茄穎

沙嗲牛麵就食得多,沙嗲牛西多真係未食過。 未食之前可能會覺得西多煉奶嘅甜同沙嗲牛嘅鹹夾埋一齊會好奇怪,但係切開一試,可能會發現自己諗多咗。沙嗲牛餡冇想像中咁多沙嗲汁,而且唔會太韌,所以食落其實都幾OK,只係食多幾啖就可能會覺得有少少膩。

5級邪惡:奶黃流沙西多士   周記點心


圖:Agnes The Foodie希望係食極唔肥小姐

周記點心嘅奶黃流沙西多應該唔使我多講,一切開就已經瘋狂咁湧晒啲奶黃流沙出嚟,好彩嘅仲會食到埋蛋黃。啲流沙流到一碟都係,記得每塊包都要沾勻嚟食,唔好嘥呀!另外,佢哋仲有款香芋流沙西多,一樣都有呢種澎湃嘅邪惡效果!

6級邪惡:千層西多士  家香


圖:Vi_lovefoodkittyzizi

唔好睇佢個樣好似細細份咁,切開一望就知呢個千層西多有幾邪惡!每層都好薄,但係每層入面都搽滿晒榛子醬同花生醬,都仲未夠,上碟嗰陣再伴埋牛油同糖漿畀你自己再增加佢嘅邪惡度,甜魔要小心失控!

7級邪惡:西多士麵包布甸   甜品堂


圖:*Sugar*Veron1406

你冇睇錯,喺甜品舖入面有西多食。西多做得甜品,有幾邪惡你哋應該都大概想像到。「西多士麵包布甸」嘅底就係熱辣辣嘅雞蛋布甸,好滑但好彩唔算好甜,因為上頭就係炸到脆卜卜嘅西多士,都好彩只係得2嚿,邪惡極有限(你以為)。但最頂再加多球雪糕,OMG!全部少少邪少少邪,唔覺唔覺咁加埋一齊就好邪惡㗎喇。

8級邪惡:特厚西多  紅點


圖:Eatllalam.yaan

西多士本身都已經夠邪惡,而家仲要嚟一份特厚西多士,厚度係比平時嘅厚一倍有多,想點先?建議返千其唔好嘗試一個人KO一份,因為都真係好大份,好飽。嗌多啲friend子一齊開心些牙啦。內餡仲有得揀,花生、奶油、朱古力、藍莓、抹茶、椰香、咖啡7種口味。嗯,排得8級邪惡,梗係唔淨止厚咁簡單,呢份西多連煉奶嘅份量都多過人,淋到成隻碟都係㗎!

終極大佬:芝士流心西多士    紅茶冰室


圖:winnie.leung.5059hkfoodie_lifestyle

最後打大佬喇!終極邪惡版嘅西多,係集合咗兩大邪惡之物喺一身嘅芝士流心西多士!中間夾心層嘅芝士,一切開就流出嚟,趁熱食嘅話拮起仲拉得到芝,加埋煉奶淋面,好Devil呀!但我鍾意!



文:Kar

隨時接收最新資訊
讚好OpenRice專頁!
關鍵字
西多士
茶餐廳
荃灣
芝士
邪惡
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
荔園茶餐廳尖沙咀開店 焦糖溫泉蛋西多夠創意(有片)
2017-06-09
【當時得令】氹仔三大牛尾湯通粉比拼
2017-05-11
【新店直擊】青洲灶記咖啡氹仔新登場!
2016-08-09
【開飯熱店入圍名單巡禮】小城地道茶記麵檔尋滋味
2017-02-27
Hello Kitty超巿再發功 新推三色Kitty雪條
2017-04-10
【國際新食力】紅到去韓國?弘大芝士麵包同港版激似
2016-07-20
餐廳資料
更多
收起
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
6天前
全城抗炎!北角酒店最新應變 自助餐都有得外賣?
2020-07-17
全城抗炎!送上門懶人煮食包及套餐大合集2.0 花膠燉湯/火鍋/鐵板燒
7天前
全城抗炎!屋企都嘆到三層架下午茶 Tea Set外送/外賣自取推介
2020-07-23