我只想身體健康!Bookmark 5間有營餐廳
2020-01-31

好味嘅嘢多數都唔健康?健康嘅嘢多數都唔好食?咁又未必!喺而家呢段非常時期,身體健康最為重要,每餐飲食都要講求均衡營養同埋健康,咁先可以抵抗病菌!前兩日同大家介紹過幾間以健康為主題嘅餐廳,今日再同大家介紹多5間,注重營養飲食嘅餐廳!其中有間,仲會免費請醫護人員食嘢添!

健康日式料理   坐忘

 圖:beefball0805paradight

以日式咖喱為主打嘅呢間小店,老闆係非常注重健康嘅日本人,以「健康比味道重要」嘅信念,創作各款無添加無味精、多菜少油嘅菜式,每道都有相當多嘅新鮮蔬菜。其中最多嗰碟「一日野菜燒汁定食」,就有近二十種菜啦~ 包括蓮藕、脆肉瓜、茄子等等。而最受歡迎嘅豬軟骨野菜咖喱飯亦有蘿蔔、翠肉瓜等7種蔬菜。咖喱汁以磨成蓉嘅蔬菜煮成,飯則用珍珠米、蕃著、粟米等煲成,成碟都咁健康!

營養師鑑定    健康味

 圖:cyn_foodiesohappy_hkg

位於觀塘嘅呢間餐廳,全店嘅菜單都經由營養師檢查過,確保少鹽少油少糖仲有低卡路里,夠晒健康。每款菜式都可選配糙米飯,仲有6-7種蔬果。其中,野米比白米有多3倍嘅纖維、1.5倍嘅蛋白質,熱量亦較少,喺呢個更需要營養、增強抵抗力嘅時候,食返份紫薯野米卷、雜錦海帶沙律伴蕎麥麵 等就啱晒啦~ 不過佢哋只做午巿,觀塘嘅打工一族就最就腳~

健身低卡    Youni

 圖:cookiewanwanglorialau2

要食得健康,低卡低脂都好重要,呢間餐廳開喺健身中心內,餐單主力為健康人士而設,當然健康。菜肉、碳水化合物等各營養比例均勻,餐牌上仲寫明每樣菜式嘅卡路里,食幾多可以自己計住數。推介去反海南雞胸肉蕎麥麵,雞肉去皮走脂,雞胸軟腍,加少少黑椒會更香口。健康飲食,都唔一定寡嘅。

屯門良心小店   聚福樓

 圖:fishtailjailessieleelee

睇個名以為係茶樓,原來係間充滿玩味嘅地區小店,樣樣菜名都古靈精怪,好似「真係米收埋隻雞」、「我個牛皮包喺邊度」咁。講到健康,招牌大晒健康沙律就梗係首選,又士多啤梨又藍莓又火箭菜,仲有紅醋、乳酪,清新開胃。全日早餐亦係推介之一,份量十足,仲包含咗坊間少見嘅奇異籽乳酪。

BTW,餐廳為表對醫護人員嘅感謝,2月7號前所有醫護人員幫襯都係免費任飲任食!

低糖茶飲   走杯

 圖:KarenkytSisselLeung

茶飲一直深得港人歡心,不過大部分嘅茶飲都落好多糖好甜,呢間就唔同喇,佢哋主打低糖飲品,除咗用天然蔗糖,仲有用無添加糖—麥呀糖醇嘅配方,即使係需要控制血糖嘅朋友都啱飲。飲品超過30款,主要分為奶蓋、奶茶、純鮮乳、水果茶、沙冰同醇茶,招牌飲品走杯金鑽蜜芋純鮮乳採用原隻蜜香芋頭,加以芋頭肉自家製嘅獨家金鑽芋圓,味道甘甜。葡萄成熟時純鮮乳則以原粒黑葡萄、烏龍茶加鮮乳調配而成,啖啖鮮果香中滲出陣陣奶香同茶香。


文:Kar


關鍵字
健康
抗逆
營養
有營
低卡
屯門
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
3天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】最後倒數!即將結業的老字號及人氣小店
6天前
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
3天前