香港人唔單止貪新，有時亦相當念舊，近年多咗餐廳以復古主題做招徠，由Menu、裝修，甚至到餐廳名都相當有玩味。以下開飯仔推介嘅六間餐廳，唔單止各有特別港式美食，可能亦可以幫你回到那些年。
粗口諧音滷味炸物小店 炸理滷味
旺角呢間小食店嘅名讀嘅時候真係要零舍小心，一唔小心讀錯就會變咗爆粗。不過睇店名你就估到小店賣嘅主要係港式炸物同滷味，招牌滷味雞脾夠入味，炸理雞脾係生炸，皮脆肉嫩仲夠哂Juicy。另一推介係溫泉玉子滷肉飯，用萬壽無疆圖案紙碗裝住肥瘦適中調味得宜嘅滷肉飯同溫泉蛋。嗌多支手工啤酒同雜物串，嚟Happy Hour都無問題。
時光倒流打邊爐 十下
圖：arwun
去銅鑼灣呢間火鍋店食飯就好似坐咗時光機回到過去咁，因為裝修主題好有七八十年代香港風格，連餐具都係回憶中嘅藍白陶瓷或者萬壽無疆圖案。配料選擇唔算好多但相當有特色，例如懷舊果皮魚蛋同豬腸粉，懷舊創意兼具。當然同時亦有大路嘅手切本地牛肉同新鮮海鮮。連飲品就有七八十後嘅回憶沙士汽水，同台式冬瓜茶等選擇。
玩味Fusion酒吧餐廳 李好味
鐘意試新嘢嘅朋友仔可以一試中環呢間港式酒吧餐廳，氣氛同同區酒吧差唔多，但裝修就換上港式摺枱摺櫈同紅色塑膠燈罩。菜式名亦非常㜺鬼，好似牛魔王過河其實就係「升呢」版嘅乾炒牛河，用A5和牛配瑞士汁炒河。又例如咸咸濕濕豬頭炳其實係鹹蛋豬肉腸煲仔飯，鹹香惹味。Cocktail同小食亦非常有香港特色，雖然定價稍高但勝在新意加分。
更多【開飯專題】： |
公屋主題懷舊茶居 老馮茶居
多得呢幾年唔少新派點心專門店，令飲茶終於成功飛甩老土形象，但如果你相反想嚟懷緬一下細細個同屋企人飲茶嘅那些年，元朗呢間以七十年代公屋做主題嘅茶居就幫到你。單係枱上面嘅公雞碗就已經勾起唔少回憶，仲有古法千層糕等因為製作方法繁複而最近越嚟越少見嘅點心。鵪鶉蛋燒賣同蝦醬蒸腩仔飯亦係推介。
童年回憶變冰室 十字冰室
十字牌牛奶應該係唔少香港人細細個就聽過嘅名，而呢間以十字牌牛奶做主題嘅冰室亦走懷舊路線，由霓虹光管到復古紅磚牆都啱哂打卡。Menu亦係只此一家，芒果木瓜牛奶麥皮同豬骨湯意粉等用咗十字牌牛奶。另外亦有新派冰室嘢食，例如黑松露炒蛋、火腿爆蛋菠蘿包、英式全日早餐等。食埋杯十字牛奶軟雪糕做甜品就完滿喇。
懷舊車仔麵檔飲綠寶 萬歲
圖：陸月妹
北角呢間車仔麵檔最出名嘅唔係湯底，亦唔係配料，而係雪櫃裡面一支支玻璃樽嘅綠寶橙汁呀！小店老闆特別喺泰國引入，暫時係全港獨家發售。飲完嘢肚仔餓就可以食佢地嘅雞翼鹵蛋燥肉飯同懷舊車仔麵，溏心蛋、蟹籽芝士丸同陳皮魚蛋都值得一試。分量比較細所以有食家覺得唔太抵食，但能夠飲返那些年嘅味道係無價嘅。
文：Cathy
