成都十大火鍋店襲港 古色古香八仙桌享用川式麻辣火鍋
2019-04-30
呢間喺尖沙咀新開嘅火鍋店係來自成都嘅知名火鍋品牌,所有湯底配料都係自產無污染、無添加嘅火鍋底料,並提供多款香港較少見嘅內臟配料。呢度嘅裝修都係一大賣點,以復古木具、屏風、老板凳、八仙桌、古老用具做裝飾,令食客好似置身於迷你四川入面,一邊享用傳統川式麻辣火鍋,一邊感受古色古香嘅氣息。



湯底嚟講,呢度嘅牛油鴛鴦鍋最值得推介。一紅一白湯底,一次過照顧晒鍾意食辣同唔食得辣嘅朋友。紅鍋係牛油麻辣湯,用上二十幾種香料同辣椒熬成,麻辣味夠晒香濃刺激,仲帶少少牛油香,但就真係偏辣。而白鍋就係豬骨湯,以豬骨、紅棗、杞子等藥材熬上10個鐘,味道鮮甜。
 
呢度有好多款平時食火鍋比較少見嘅配料,而且擺盤豪華,例如呢款一米鴨腸就係其中一個主打配料。點解叫一米鴨腸?因為呢盤捲到蛇餅咁嘅鴨腸每條長短都差唔多有一米長 !鴨腸清洗得乾淨,無腥味,口感脆嫩。
 
一米鴨腸($88)

紅酒腰片即係豬腎,落鍋前淋上一半紅酒,可以癖除腥味,煮熟後再點埋剩低嘅紅酒,令爽脆腰片沾上濃濃酒香,食法特別。

 紅酒腰片 ($88)

金牌脆毛肚亦係店舖主打之一,係四川嘅熱門火鍋配料。呢度嘅毛肚亦都處理得乾淨無腥味,而且色澤自然,無漂白過,可以放心食用。毛肚只需滾10-20秒就食得,口感又脆又爽。

金牌脆毛肚 ($108)


唔太好內臟嘅朋友唔駛怕,呢度嘅一米肥牛都滿足到你。叫一米肥牛係因為擺盤有成一米長,啱晒打卡,而且肥牛嚟自本地,比較新鮮,肉質嫩滑有牛味。


一米肥牛 ($138)
 
另外仲有安格斯肥牛提供,油花更肥美,食落帶油香,性價比高。


安格斯肥牛($108)

一串串麻辣雞腎插喺竹筒入面,望落好得意。麻辣雞腎顏色暗紅,外層厚厚嘅麻辣醬係以十幾款辣椒炮製,辣味濃烈好刺激。而雞腎爽脆,無苦澀味。

麻辣雞腎 ($88)
 
牛黃喉即係牛嘅喉嚨軟骨位,每塊都非常厚身,口感又爽又滑,亦係香港比較少食得到嘅火鍋配料。

金牌牛黃喉 ($88)

相信軟嫩嘅鴨血係好多人食火鍋嘅必點配料之一。呢度嘅鴨血切得大片又厚身,口感軟滑唔易碎,建議放入麻辣鍋燙熟,令鴨血吸收湯嘅香辣精華,食落更濃味可口。

鮮鴨血 ($32)

呢度一個個成舊生薯仔咁嘅嘢原來係包嚟!薯仔包係呢度嘅自家製小食,外貌成個迷你馬鈴薯咁,內餡係燕麥、燕麥糖同蛋黃,食落味道香甜似蜜糖味,麥味香濃,食麻辣鍋覺得太辣,又可以用嚟解解辣。

薯仔包 ($58) 

另外值得一提嘅係,呢度嘅醬料以蠔油代替豉油,而枱面上仲有一罐罐自家香麻油比食客加入調味料入面,味道會較鮮香之餘,有降火作用,令麻辣味唔會太膩。


地址: 尖沙咀寶勒巷3號萬事昌廣場1樓101號舖

文、相:Kenna

關鍵字
火鍋
麻辣
四川
成都
鴨腸
邊爐
尖沙咀
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
1天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18