冬天掃街最想食啲暖笠笠又惹味嘅小食？銅鑼灣呢間新開主打雞蛋仔嘅小食店就啱喇！佢哋嘅雞蛋仔有好多唔同口味，而且會按季節更換，例如最近轉涼就有臘腸芝士、泰式炒蝦、香芋黑糯米等等。配埋自家製健康米水，鍾意試新嘢嘅朋友唔好錯過呀。

百變蛋君今年10月喺銅鑼灣新登場，店主自己細細個就鍾意食雞蛋仔，覺得以前通常得原味無乜創意，就自己花咗近一年時間去研究，希望做到一款有Spongy咬口得嚟又可以配搭唔同食材嘅雞蛋仔。連裝雞蛋仔嘅紙盒都係特別設計，方便單手食之餘又有窿疏氣㗎。
 

臘腸芝士（$42）

唔少人冬天必食嘅臘腸煲仔飯變成雞蛋仔口味！蛋漿加入一粒粒臘腸同芝士碎，差唔多每一粒雞蛋仔裡面都食到臘腸粒同芝士，夠足料。而臘腸嘅油香同鹹香估唔到同脆口嘅雞蛋仔又幾夾，芝士趁熱亦做到拉絲效果，不過食落就略嫌臘腸香蓋過芝士味，同朋友Share嚟食就啱啱好。
 

泰式炒蝦（$38）

店主希望唔同季節都可以推出啱返時令嘅口味，好似冬天就特別設計出香辣嘅泰式炒蝦！蝦其實係採用蝦乾，無論聞落定食落都有好香嘅蝦味。而且食食下辣味後勁就會衝返出嚟，因為另一亮點係辣椒乾，辣得嚟唔嗆喉，好刺激。
 

淮山紫薯（$32）

小店選料認真，好似雞蛋會一直用唔同地方嘅雞蛋去試保持品質，而紫薯亦絕對唔會用紫心番薯濫竽充數，而係親自去街市搵新鮮紫薯。呢款就配搭淮山，兩款食材分別蒸熟再手工壓成泥。食落口感特別外脆內棉，味道就以紫薯嘅淡淡甜味為主。
 

 

香芋黑糯米（$35）

香芋紫米露就食得多，糖水口味變成雞蛋仔一樣得！裡面有芋泥同黑糯米，一粒粒煙韌黑糯米幾有咬口，味道就相對比較淡。溫馨提示返有芋泥、紫薯泥嘅呢啲雞蛋仔記得盡快食，因為裡面嘅水分會令雞蛋仔變腍唷。
 

桂花酒釀米水（$28）

呢度亦有供應花茶、米水、奶茶等飲品，特別推介小店自己煲嘅米水，落咗薏米、紅米等唔同類型嘅米，最重要嘅係有助調和中氣同去水腫！冬天推介呢杯桂花酒釀米水，飲落先有淡淡桂花香，再有淡淡米香同酒釀嘅少少酸味，而且咬到一粒粒唔同嘅米，好飲又好食。

而且呢度嘅米水都有好多唔同配搭，可以夾返雞蛋仔口味，好似臘腸芝士雞蛋仔可以配桂花酒釀米水或者原味蛋君米水（$24），一甜一鹹，米水嘅米香夾臘腸仲有臘腸煲仔飯嘅Feel！而好多朱古力雞蛋仔（$25）就可以配新鮮香蕉海鹽米水（$30），香蕉同朱古力係絕配之餘，海鹽可以解膩吖嘛。
 

百變蛋君
地址：銅鑼灣景隆街30-34號海殿大廈地下5A號舖

文、相、片：Cathy