中環蘇豪區嘅酒吧餐廳選擇可謂五花八門，最近就新開一間較罕有嘅馬來西亞式酒吧餐廳。餐廳取名為JALAN，喺馬來西亞語中係「街頭」嘅意思。餐廳希望可以將大馬風味呈現畀香港人，菜式及飲品集馬來西亞「mamak」(食檔)、「pasar malam」(夜市)及「kopitiam」(咖啡店)精髓於一身，有啲仲融合咗中式元素添～

巴東牛肉咖喱角($90)

平時食港式咖喱角就食得多，呢度嘅係馬來西亞咖哩角變奏版，外皮香脆厚實，咖哩角內釀入咗惹味多汁嘅椰香燉牛肉，點埋汁食味道又豐富啲。

喇沙炸雞($135)

喇沙通常都係湯麵，喇沙味嘅炸雞你又食過未？炸雞選用雞腿肉，嫩滑多汁，外皮粉漿香脆薄身。而靈魂椰子咖哩汁比起坊間嘅喇沙香料味就重啲，帶些微辣味，做小食就最啱！

黑椒茄子($125)

大廚話呢味菜嘅靈感取自黑胡椒炒蟹，茄子灑上香料後煙燻，食落有黑椒味及淡淡煙燻香，味道就無咁單調啦～配以清新爽脆嘅香草沙律又幾開胃。

椰子烤大蝦咖喱($195)

以青辣椒同薑黃炮製，咖哩香而不辣，帶濃濃椰香味～而且連椰子肉都可以挖埋出嚟食。大蝦爽口彈牙，不過最重要一定要叫埋個椰汁飯配咖喱汁食啊，椰香味好香濃，配埋咖喱汁真係完美配搭。

斑蘭吉士醬冬甩($80)、炸香蕉配雪糕

出街食飯一定要食埋個甜品先滿足嘅！兩個甜品都係必食推介，斑蘭吉士醬冬甩好鬆軟，而內裡嘅斑蘭吉士醬重椰香之餘又唔會太甜；炸香蕉斑蘭配雪糕一凍一熱，又點會唔好食呢～

另外餐廳亦有供應多款向Disco年代致敬的雞尾酒，同朋友邊食邊傾就最啱！

Jalan

地址: 中環卑利街42號地舖

文、相、片: Yanica