情人節微醺之夜 6 間天台/露天酒吧指南
2020-01-31

各位男朋友、女朋友們,仲有兩個禮拜就情人節啦~ 諗好去邊未先?同另一半撐檯腳,氣氛同嘢食一樣咁重要啊~ 如果身邊嗰個都飲得兩杯嘅,不妨揀返間天台酒吧啦~ 有靚景又有靚酒,仲好有feel添~

超創新cocktail The Envoy 


圖﹕Katypotastings marketing

酒吧位於酒店嘅3樓,可以睇晒中環嘅繁華城景。呢度嘅cocktail加入咗好多創新元素,好似斑蘭、椰子糖、人蔘等。想sweet住過情人節,不妨試下呢杯甜甜嘅Dinosaur,加入咗godiva朱古力酒、Vodka、奶,仲有美祿雪糕添,配上恐龍蛋造型杯,so cute!

港女夢幻聖地 Sevva


圖﹕Queenatanjanetwongwsc

奢華嘅裝修、坐擁中半山嘅靚景…...素來係港女們朝聖地之一,帶女朋友嚟實開心死佢啦!企喺天台可以飽覽晒中環大大小小嘅建築物,搖住紅酒杯,微醺嘅氣氛下感覺更浪漫!如果仲想畀女朋友一個surprise嘅話,可以嗌招牌嘅Marie Antoinette's Crave;蛋糕上有超大個粉紅色(亦可以揀粉藍色)綿花糖,再配上唔同顏色嘅馬卡龍,好夢幻!

太古無敵海景 Sugar (Bar.Deck.Lounge)


圖﹕Sunny71298、Sugar (Bar.Deck.Lounge) Facebook官方專頁

睇海景唔一定要中環、尖沙咀嘅,呢間位於太古嘅天台酒吧,就可以飽覽更廣闊嘅海景,感覺更relax、更chill呀!呢度提供各式酒類,無論係martini、rum,定手工啤酒都有。同自己honey過情人節,當然要應景嗌返杯Honey Bee啦!氣泡酒中加入蜜糖、蜜桃、香橙,sweet爆啦!

188度維港海景 Le 188° 餐廳及酒廊 


圖﹕ckyiu、Le 188 Restaurant & Lounge  Facebook官方專頁

呢間酒吧位於酒店頂層 41樓,透過超大落地玻璃窗,坐邊個位都可以睇到海景,完全唔使同人逼!酒吧裝修典雅,而且仲有歌手演唱,好有情調。餐廳仲設有6道菜情人節套餐,以法國菜為主,前菜有煎法國鴨肝,而主菜就有波士頓龍蝦意式雲吞或者黑松露牛仔柳,浪漫又矜貴,簡直係一個夢想中嘅情人節!

旺角手工啤酒 The Garage Bar 


圖﹕ cutely3001、餐廳提供

如果嫌年年情人節都係法國菜、cocktail好悶嘅話,咁不如搞啲新意思,兩個人causal啲飲啤酒又點睇呢?呢間戶外露天酒吧喺旺角鬧市之中,提供超過40款嘅本地、多國嘅手工啤酒,實有款啱你口味嘅。如果女朋友怕啤酒苦嘅話,呢間酒吧提供帶果味嘅啤酒,包括Thistly Cross Strawberry、The Artist Raspberry Beer等,甜中帶點苦,仲唔係愛情?

佐敦萬千燈火 Horizonte Lounge


圖﹕ Horizonte Lounge Facebook官方專頁

又一間唔使過海嘅露天酒吧~呢間位於佐敦,見盡開揚嘅繁華城景,夜晚嘅時候,每棟大廈都點點燈火,意外地浪漫呀!酒吧提供各式嘅cocktail,而招牌cocktail大部份都加入水果,好似Floating Strawberry、Passion Apple等,甜甜哋啱晒情人節飲啦!想特別少少嘅可以試下佢哋嘅念慈奄調酒啦!帶有荔枝、蘋果嘅香甜,好有層次~



文﹕Kiko
編:Kar



關鍵字
情人節
天台酒吧
cocktail
雞尾酒
海景
手工啤酒
法國菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
3天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】最後倒數!即將結業的老字號及人氣小店
6天前
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
3天前