必飲招牌芝士草莓雪沙!元朗人龍茶飲店重開 最高紀錄日賣過千杯
5天前

終於開返啦!講緊元朗呢間主打芝士鮮果雪沙嘅茶飲店,舊年年底結業後唔少Fans大歎可惜,最近終於喺同區重開。唔單止依然有熱賣No.1嘅芝士草莓雪沙,仲有期間限定嘅芝士蜜桃雪沙,而鮮果茶亦「升呢」回歸!
 


夏茶新店位於元朗炮仗坊,一開門就有唔少街坊嚟買。負責人Hamiko透露之前開喺康樂路嘅時候最高紀錄係單日賣超過1,200杯飲品!咁受歡迎皆因真材實料又夠用心,例如佢哋而家依然堅持自己去果欄買新鮮當造水果,部分仲要揀埋產地,要求好高。

芝士奶蓋亦係每日新鮮製作,沿用之前嘅配方以紐西蘭品牌嘅忌廉芝士加上淡忌廉打成,配方係開店嘅時候不斷調整最後得出嘅理想比例,芝士味濃郁、鹹香突出而最後會有少少牛奶甜味,口感綿滑、濃厚,但又唔會竭撻撻到吸唔起。
 


芝士草莓雪沙($40)

熱賣No.1就係呢杯芝士草莓雪沙,單日最高紀錄賣出超過400杯!而家用緊「章姬」士多啤梨,係一款帶少少奶味嘅日本品種。將新鮮士多啤梨、鮮奶加冰打成細碎嘅雪沙,飲落完全就係果香非常濃郁嘅士多啤梨牛奶。而且打嘅時候特別分兩次加入士多啤梨,保留部分果肉碎更有咬口!同帶鹹香嘅芝士奶蓋一齊飲好夾呢。
 


芝士牛油果雪沙($42)

牛油果就選用牛油果香比較濃郁嘅墨西哥牛油果,每日即開即切,只會用熟度啱啱好嘅果肉。牛油果雪沙嘅口感就更Creamy厚滑,撈埋奶蓋一齊飲嘅話直請好似奶昔咁香濃!牛油果味道都夠,唔會話畀芝士味蓋過。
 

更多【新店直擊】:
1. 【為舊區注入新意】甜/酸/苦/辣輕食配咖啡 上水新開Cafe+藝文空間
2. 將軍澳全新日本蜂蜜主題店 主打果蜜健康茶飲+原塊蜂巢蜂蜜軟雪糕
3. 中環新開大型酒吧餐廳 必食新加坡辣蟹醬煮青口+火焰心太軟

 

芝士蜜桃雪沙($40,期間限定)

鍾意桃嘅朋友唔可以錯過!9月蜜桃當造,Hamiko用新鮮白桃打成果香濃郁、甜度適中嘅淡粉紅雪沙。同士多啤梨雪沙一樣,桃肉都係先後分兩次加入打碎,所以雪沙夠細夠棉,同時又有少少白桃果肉碎夾雜其中,味道清甜。Hamiko仲話希望遲啲可以出埋蜜桃茶呀。
 


特製鮮果茶($38,暫定每日限量30杯)

鮮果茶「升呢」回歸,一方面係指水果增加至而家嘅接近半杯分量!另一方面係茶底重新調整,保留茉莉綠茶嘅清香同時唔會搶味。水果同樣會按時令調整,常見嘅會有橙、菠蘿、香水檸檬、酸柑橘,呢幾款都可以大大增加熱帶水果香氣。而開飯仔採訪當時嘅呢杯仲有士多啤梨、西瓜、白桃,再加薄荷葉,整體酸甜清爽。
 


雖然重開初期飲品選擇未有之前咁多,但負責人Hamiko相信佢同同事做熟上手之後,會有空間慢慢增加新飲品,大家可以期待!溫馨提示埋大家,小店暫時未有得電話落單,而且每杯都係即點即製,想飲佢哋嘅飲品最好預留多啲啲時間啦。
 





夏茶
地址:元朗元朗炮仗坊36號地舖




文、相:Cathy.H

關鍵字
元朗
台式飲品
芝士鮮果雪沙
芝士奶蓋
水果茶
夏茶
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【2021生日優惠】持續更新!9月壽星嘆Omakase送壽司蛋糕+清酒
2021-08-31
【隨時更新】零食速報 每周新款零食、酒品點評
6天前
【特約分享】Happy Hour飲番杯Schweppes®期間限定特飲!9間必去銅鑼灣餐廳(上)
2021-08-24
【特約分享】Happy Hour飲番杯Schweppes®期間限定特飲!9間必去銅鑼灣餐廳(下)
2021-08-31
自家製作!五間手工意大利麵專門店合集
2021-08-24