銅鑼灣呢間恐龍主題餐廳咁得意嘅，賣咩㗎？哦～原來係一間日式外賣店，店舖主打多種口味腐皮壽司、飯糰同埋便當，負責人Tim就話同區較少呢類型嘅餐廳，而且自己又好鍾意食日本菜，所以就衍生咗呢個idea！餐廳用恐龍為主題，以綠色+白色+啡色為主調，食物都吸睛好味又抵食，附近嘅上班族可以諗諗佢！
當中最吸睛一定係呢八個口味嘅腐皮壽司啦！口味全部都係自己構思，日本風腐皮壽司味道一向偏甜，由於要遷就返港人口味，所以刻意減少返甜度。至於米飯全部都沿用日本米，粒粒分明。
牛油果三文魚腐皮壽司($18)係性價比最高嘅壽司之一，而且牛油果同三文魚一向都係最佳配搭。
明太子控一定不可錯過呢款明太子三文魚腐皮壽司($18)，明太子微微帶辣。
蕃茄玉米鵪鶉蛋($16)呢款就夠晒特別，內層係飯+新鮮蕃茄+粟米嘅組合，真係有種食蕃茄蛋飯嘅感覺。
蔥吞拿拖羅蓉($19)係另一款抵食之選，有滿滿嘅拖羅蓉同吞拿魚粒粒。
至於另外四款口味包括鰻魚玉子燒絲($18)、甜蝦蟹籽雙拼($21)、蕃茄玉米碎蛋($16)同泡菜三文魚($16)。
餐廳同樣有多款口味嘅日式飯糰，較特別有呢個川味辣雞飯糰($14)，將川式辣雞融入日式飯糰度都係第一次見～超級溏心蛋($14)同除了明太子我什麼都不想要($15)都好吸引啊！
呢個溏心蛋薑蔥雞扒丼($48)可以話係新加坡+港式口味，飯底加入海南雞飯豉油醬汁，上層鋪上滿滿嘅薑蔥，惹味之餘帶少少甜香～
地址: 銅鑼灣耀華街3號百樂中心地下G01號舖
文: Yanica
相、片: Tom Li