上年咪有間京都抹茶老店喺沙田開咗嘅，佢哋最近進駐入九龍，喺商場開pop up店，仲有新推出咗隻特濃6層抹茶卷呀，抹茶控，出動喇喂！

呢次開pop up店嘅地點，係九龍嘅中心地帶，朗豪坊呀，好方便。即刻同大家睇下新舖有咩食先！

第一眼望到嘅，就係呢個特濃六層抹茶卷。因為佢實在太抹茶喇，由外到內到返外，六層都係唔同口感嘅抹茶！逐層數，最外面開始，分別係抹茶朱古力、抹茶海綿蛋糕、抹茶忌廉、抹茶mousse、抹茶班戟同抹茶芝士。一啖食晒六種口感好鬼豐富，鍾意逐層拆開慢慢試真啲又得。忌廉同mousse層夠軟滑，而件芝士就有些少鹹鹹地，但每層嘅抹茶都好香濃，抹茶控肯肯定邊食邊尖叫。每日限量發售，唔喺呢區返工返學嘅朋友仔就可以去沙田分店。

另一樣新品就係3款口味嘅忌廉三文治，包括：抹茶、士多啤梨同芒果。喺日、韓嘅便利店一早已經有各款鮮果忌廉三文治，睇IG睇得多，而家終於有得親身試喇！軟熟嘅麵包，夾住厚厚der滑滑der忌廉，仲有真‧果肉添，當中又以抹茶配紅豆嘅味道最濃。

仲有呢五款大福，大福皮略厚，都幾黏手。抹茶味就當然係抹茶控首選啦，而其餘嘅士多啤梨、芒果同blue burry 就堅係有粒粒果肉夾喺中間添，至於粟子味就相對較淡喇。

清水一芳園
地址：旺角朗豪坊 4 樓 K402號
期間限定：即日起至 5 月 31 日

文、相：Kar
片：Cathy