成日話將軍澳無嘢好食？繼早前開咗間席前鐵板燒後，最近又有另一間日式居酒屋進駐，對於附近嘅街坊嚟講係一大喜訊呀！餐廳以日本東京街頭嘅熙來攘往為藍本，將日本人下班後小酌文化帶到香港。食物方面由日籍主廚北出佑介（Yusuke Kitade）先生主理，主廚擅於融會東西方嘅烹調技巧，供應過百款居酒屋菜式，除咗前菜、手握壽司、刺身、烏冬及飯類外，仲有串燒、揚物、天婦羅及關東煮等，選擇好多元化！
和牛日本土鍋飯（$380）
以日本和牛入饌，而且特別選用享負盛名嘅日本宮崎縣A4和牛，呢隻和牛係「和牛奧林匹克」中嘅冠軍和牛～口感入口即溶，搭配埋法式馬德拉醬汁更能突顯油花香氣。大廚更加入原隻生蛋黃，流心蛋黃加埋和牛油香同醬汁，撈飯食真係一流。
鰻魚稻荷壽司（$68）
鰻魚稻荷壽司以香甜腐皮包裹嫩滑嘅烤鰻魚，味道同口感都好rich。
鯖棒壽司（$268）
鯖棒壽司係關西料理，喺香港可以食到鯖棒壽司嘅機會唔多，魚肉鹹香魚味突出，而且帶有淡淡酸味有助解膩。
更多【新店直擊】： |
串燒雜錦
所有串燒都即叫即燒，唔同食材會搭配唔同嘅燒烤方式，以突顯食材特性，包括用來自日本九州鹿兒島放養地雞炮製嘅地道燒鳥料理，如雞腿丶雞皮丶雞頸肉丶雞肝丶雞尾及雞心等，仲有牛舌及黑豚腩肉等選擇～推介混合山芋製成嘅免治雞肉棒（$45），雞肉肉汁鮮香，配以日式照燒汁及日本生雞蛋食更香濃惹味。
海膽汁燒鱈場蟹（$230）
海鮮控要留意喇！燒鱈場蟹時加入日式酸汁提味，最後加入香濃海膽汁，鮮上加鮮～
蛋黃漬牛油果大吞拿魚腩他他（$210）
選用來自日本大善豐洲市場百年老店嘅拖羅，配搭牛油果蓉、蛋黃漬及魚子醬，更可以提升拖羅鮮味。
新鮮豆腐皮拌海膽（$65）
地址: 將軍澳唐俊街18號The Parkside第一座地下G07號舖
文: Yanica
相: Tom Li