得閒飲「茶」 5間特色茶室介紹返
2017-07-18

成日都話得閒飲茶,但得閒嗰陣,你有幾何得閒真係去飲「茶」先?近年多咗人品茶,茶室亦都開咗唔少,間間都各有特色,今次講住5間先。

湯圓配中國茶   Mr. S. Y. Punti

圖:Helenbobo39im_bowiecc(Instagram)

過時過節屋企一定會食湯圓,而通常食湯圓,都係配薑汁糖水,辣辣地又甜甜地咁食。之但係,呢間小店幾得意,湯圓可以選配中國茶呢個新配搭,芝麻湯圓浸住喺烏龍茶中,滲有茶香,甜中帶甘。至於茶飲,可以試下杏仁茶,杏仁餘韻幾香,甜度適中但又唔會蓋過茶香。

手工茶味意式雪糕   茶作

圖:Foodcaptain.hkWildchildcarol

傳統中國茶、手工奶茶等等都有得飲,老闆得閒嘅話仲會親自示範點樣泡茶,分享下茶道咁,即使初入門嘅朋友仔都可以體驗下。夏天飲凍嘢最開心,所以冷泡茶會係唔錯嘅選擇,但上到嚟不能不試嘅,一定係呢度嘅手工茶味意式雪糕!鐵觀音呀、蜂蜜茉莉龍珠呀、普洱呀、桔普雪芭等等都有,有啲茶味香濃啲,有啲清香啲,係幾特別嘅,不過喺新蒲崗又真係遠咗少少呀。

焦烤檸檬茶   茶。家

圖:mandy-suenTwingyli

抹茶控對呢間一定唔會陌生,佢哋嘅人氣之選,綠茶芝士蛋糕茶味同芝士味平衡,兩者都做得香濃而幼滑。不過如果試過嘅朋友,再嚟可以試其他款式,泰式奶茶芝士蛋糕都唔錯呀,特別嘅口味唔係周圍搵到。焦烤檸檬茶係另一推介,檸檬茶成日飲,但檸檬經過燒烤嘅過程,帶有焦香味,同平時嘅感覺唔同呀。

特濃朱古力茶壺   人間世茶會館

圖:cfung426懶羊Jim

觀塘呢間工廈café聚集之地,亦開咗間茶館,地方非常之寬敞,一心想嚟悠閒嘆茶,hea返個下晝嘅就啱晒。環境清靜,亦有唔少茶具供欣賞。店主閒來亦會分享下泡茶嘅心得,茶客可以互相交流。而且呢度嘅茶款都幾多,普洱、鐵觀音以外,亦有少見嘅巖茶、單欉。配茶甜品都有幾樣選擇,配搭特別嘅有豆腐mousse茶餅,外貌協會嘅就有成個茶壺形嘅特濃朱古力mousse。

清純品茗   文博軒

圖:月兔子Kitty食

真文青應該會幾鍾意呢度,首先地利方面,佢喺文青最愛嘅賽馬會創意藝術中心度。而內涵,即係佢嘅menu亦見特色,時下興食餃子,佢都有,仲要係薑汁芥蘭餃子,薑味突出而唔辣。其餘輕食包括桂花糕、檸檬紅茶果凍等。呢度以提供清純品茗為主,係一個可以安靜享受同學習品茶嘅地方,出面比較少飲到嘅肉桂紅茶都有得飲,btw想睇茶藝示範嘅就需要預早約定喇。


文:Kar


關鍵字
觀塘
新蒲崗
上環
西環
茶室
甜品
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
3天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
2月份好評餐廳十強
2020-03-05
【3月生日】優惠情報!有折扣仲有生蠔送
2020-03-03