幾時都要打邊爐!火鍋控必試特色店!
2019-07-13
香港人瘋狂愛打邊爐,飯聚打、Re-U打、生日打、團年打,無分四季時節,想滾就滾﹗正因為如此,本地嘅火鍋文化亦變得多元化,由地道嘅港式火鍋到最火紅嘅麻辣火鍋、搞鬼嘅日式火鍋等,中日韓泰式口味,真係日日打邊爐都唔會厭!以下幾間特色火鍋店總有一間啱你:

米走雞Deluxe (銅鑼灣)      
米走雞係一家芝士雞煲專門店以黃金芝士雞煲作招徠,主打自創嘅「黃金芝士雞煲」及獨家嘅「火焰麻辣雞煲」。新式火鍋店嘅格局,裝潢以啡褐色為主,牆壁上有格調咁掛着Brooklyn Bridge嘅油畫。店內大部份座位都係梳化卡位,每張枱都有獨立電磁爐,間隔寬敞,坐得舒適,非常適合情侶撐枱腳或許一大班朋友嚟gathering!

黃金芝士雞煲
店內主打嘅芝士雞煲每日用上5種芝士熬製足5個鐘,雞肉只選用大大啖肉嘅雞腿肉,唔會有骨慘慘嘅背脊骨又或者鞋颯颯嘅雞胸,配埋芝士碎、洋蔥、中芹、芫茜等配料一齊食,芝士意外地同鮮雞感覺匹配。

客人可以自行選擇芝士濃度,厚厚一層芝士好像初春踏雪一樣輕輕覆蓋住啲雞肉, 金黃色嘅秘製芝士醬,唔會太濃亦唔會太稀,可以讓每件雞都沾滿咗濃濃芝士味,又做到拉絲嘅效果,入口雞腿肉質鮮嫩多汁又芝味十足,超邪惡但係超好食呀!芝士迷萬勿錯過! (完成後可加芝士湯轉為打邊爐)

火焰麻辣雞煲 

店員會即場係客人面前加熱並開蓋兼點火炒斬件雞腿肉,陣陣辣味炒起勁香。火焰炙燒食材,將麻辣香逼入雞件,令味道更突出更有層次感。厚肉雞腿肉,吸晒麻辣汁,辣得好惹味。還有多種配料如芹菜、洋蔥、芫荽、辣椒乾等,令雞煲味道都生色不少。仲可以選口味 (由清淡到特濃) 以及辣度。先食,之後可以加麻辣湯或者清湯打邊爐。有得食有表演睇, 好得意呀! 

哈哈蝦中寶
晶瑩剔透嘅蝦膠,混入咗大量蟹籽、芹菜和原隻中蝦,用料十足,絕不馬虎!蝦膠焯熟後,仍然保持着鮮蝦彈牙有嚼勁嘅口感,同時又食到脆卜卜嘅蟹籽,多重口感,味道鮮美又滋味,食到停唔到口,小編一試便迷上! 

竹笙墨魚滑

手打墨魚滑,釀入塊竹笙入面,竹笙吸收曬啲湯汁,咬落去先係吸哂芝士/麻辣湯汁既竹笙,再黎就係鮮味十足既墨魚滑,又爽又彈牙,非常有趣!

手打五寶拼盤
自家手打鮮墨丸、手打鮮蝦丸、手打鯪魚丸、手打豬肉丸、手打鮮牛丸,全部日日新鮮製造,必食推介! 


粥地海鮮粥底火鍋 (大埔) 
近年香港興起食粥底火鍋,粥底火鍋店越開越多,粥地店面細細但深受食客讚賞,經常爆滿,全因店內「以鮮取勝」。老闆每日親自挑選海鮮市場嘅新鮮海鮮,堅持只供應最當造嘅靚海鮮比客人,「不時不食」!唔少試過嘅網友都話依間粥底火鍋CP值勁高!  

粥地海鮮粥底火鍋套餐 
海鮮每日新鮮送到, 保證生猛!套餐包括:7款指定時令海鮮+3款菜蔬(南瓜粒, 芋頭粒, 粟米)+5款自選配料(可選: 肥牛, 黑豚, 丸類,等等), 客人可以先用秘製粥底打邊爐,食完海鮮之後再品嚐鮮甜味美嘅海鮮精華粥! 

粥地秘製豬肚雞煲 
豬肚夠爽口,雞件亦都好入味,成個雞煲都好足料,仲無落味精,可以選擇辣度,或完全不辣,一樣咁惹味!


鬼馬雙星
油炸鬼加上墨魚滑製成嘅火鍋配料,油炸鬼入鍋後可以吸引湯汁嘅味道,配上爽口嘅墨魚滑,口感新鮮有特色! 

即叫即炸響鈴

響鈴即叫即炸,一咬「嗦」「嗦」聲,入口鬆脆有豆香, 可配雞醬當小食,或當作火鍋配料火鍋,一樣咁好味!

椒鹽腐碌卷
店內新推嘅小食椒鹽腐碌卷,用黎送海鮮精華粥、送酒都一樣咁正! 


4號烤吧 (太和)      
位於太和地鐵站附近嘅「4號烤吧」環境舒適寬敞,裝潢有心思,餐廳外面有一面以烤吧為主題嘅巨型壁畫,非常搶眼,行過嘅路人都會影張相打個卡。餐廳內掛住唔少過瘾嘅掛畫,同多部電視約客人可以三五好友相約嚟睇球賽,更設有卡拉OK位置,客人嚟到可以一展歌喉!

瑚南椒風味烤沙巴龍躉
店內烤魚可選凌波魚及沙巴龍躉,更可選大、中、小辣。烤魚做法考究,師傅將整條魚直接放入特製的焗爐,再用高溫烤,所以不會像一般油炸的乾身。湖南椒風味比招牌烤魚,味道更濃郁更惹火,嗜辣嘅你必試!

菌皇花雕醉雞煲 
湯底融合咗滋補清香嘅藥材,同遠年花雕酒嘅深沈醇厚同溫潤甘美嘅菌香雞湯,可說是集精華於一身!醃過嘅雞肉質地軟嫩,充滿住花雕嘅酒香同菌皇嘅香氣,好補!

冰鎮鮮味鮑魚
冰鎮鮑魚既消暑,又能品嚐鮑魚啖啖鮮嫩,爽滑彈牙的口感! 可以配上日式芥辣醬或胡麻醬,更能帶出鮮魚嘅鮮味! 

磯燒北海道元貝及法國生蠔

以北海道直送元貝的質地厚實,彈牙美味,燒熟後,入口陣陣磯燒香,質感一流!生蠔蠔燒熟後因水分收縮比生吃香口,蠔味更濃郁! 兩者都可選擇蒜蓉、燒汁或自灼各種風味!

串燒什錦
店內嘅串燒全部都下單即燒,保證熱辣香口,不妨一試!
(左至右:安格斯一口牛、燒雞軟、燒牛脷、燒羊肉、燒雞皮、 燒羊架)  


盈海四季中日火鍋料理(沙田)       
位於香港科學園的盈海四季火鍋料理以合理價錢提供優質食物,有泰菜,小菜,火鍋等多種菜式選擇。客人可以係店內望住海景享受新鮮空運到港嘅多款海鮮同小菜,係與親朋好友食晚飯打邊爐嘅好去處!

夏日冬瓜鍋
用上鮮蝦、帶子、瑤柱、金華火腿煮食嘅足料冬瓜盅做湯底夠晒有創意,最啱夏天食用,打邊爐得嚟仲可以一邊消暑!值得一試!

特級手切肥牛 
選用優質安格斯牛肉,即叫師傅即切,無論牛肉粒定係牛肉片都只用牛頸脊部分,灼兩下,即刻咬入口,肉質鮮美!

脆皮牛腩配咖哩汁
用秘製香料滷到軟嫩嘅牛腩,裹粉油炸至外酥內嫩,再沾上中國式惹咖喱汁,無論大人細路都會愛上! 

酸辣鳳爪

無骨嘅酸辣鳳爪混合酸、甜、辣嘅味道,係一道非常有泰式風味嘅開胃小食!

肉碎生菜包
用清爽可口嘅生菜包住用泰國香料炒至香濃惹味嘅肉碎,入口酸酸辣辣又唔會有肉膩感!  


心動不如行動!有興趣就快啲約埋三五知己去嘆下美食啦!快啲bookmark定啦!

*以上圖片只供參考,所有食品以實物為準. 食品供應因餐廳而異

關鍵字
火鍋
海鮮
粥底火鍋
雞煲
港式火鍋
觀塘
銅鑼灣
旺角
太和
沙田
科學園
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-07-10
炎夏感bye-bye!6至7月下午茶推介
2019-06-24
美食荒漠不再 馬鞍山8間新餐廳推介
2019-07-02
6月份好評餐廳十強
2019-07-04
盛夏Take個break 7-8月下午茶推介
2019-07-16