平民熟食中心 品嘗那些年的味道
2016-03-15
要搵好東西食,唔一定要去到啲高級或者貴價餐廳先食到,有時反而去下啲平民飯堂,分分鐘仲有驚喜:價錢平大一截,但食物水準同樣出色,仲可以食到那些年嘅味道,間唔中食一餐都係一種享受。今次開飯仔就搵咗5間喺街巿/巿政大樓上嘅熟食中心裡面嘅餐廳,講明先,環境就真係好一般㗎喇。

上環樽仔茶啡  瑞記咖啡


Photos by Rate fOr You & Cherryleung


就算唔係港島人,都應該有聽過瑞記咖啡呢個名。開業超過60年,老闆到今時今日都依然堅持會自己沖奶茶咖啡畀啲客飲。舖頭幢牆貼住兩句「對聯」:「咖啡稱皇」、「奶茶稱霸」,係有霸氣嘅,但霸氣背後係真材實料。呢度嘅凍奶茶同凍咖啡全部都係用樽裝,好似可樂咁,一粒冰都冇加但就好夠凍。因為冇加冰,奶茶咖啡本身嘅味道就唔會被沖淡,奶香且滑,一樽等於出面兩三杯嚕,好抵。

西多士亦係與眾不同,如果你抱住要西多一定係跟花生醬同糖漿嘅心態嚟,sorry嘞咁,你可能會失望喇。瑞記出品嘅西多,係以煉奶做標記嘅,一塊方包連埋蛋漿煎香咗,再加大量,係大量,滿到瀉嘅煉奶,熱辣辣又脆脆地,第二度真係食唔到。另外,識食嘅一定會食埋鮮牛蛋包,烘香咗嘅熱狗包夾住碎牛肉同炒蛋,夠晒鬆軟同飽肚。

旺角咖喱農夫包  澳門翠苑餐廳


Photos by Criswen & 晞


旺角呢間熟食中心同名店森立嘅朗豪坊只不過係一街之隔,但係環境就差好遠嘞。喺煩囂嘅鬧巿之中,仍然保留到些少舊式香港嘅飯堂色彩,都幾難得。一入到熟食中心嘅第一間餐廳就係呢間嘞,望一望餐牌,都係出面唔多食到嘅嘢食。

唔係太肚餓,純粹過下口癮嘅可以食個奶油豬,烘到金黃色咁好鬼脆,仲好有牛油嘅香味,脆脆地咁食兩件仔,配埋個奄列都唔會太膩。但如果真係要醫肚嘅,強烈推薦咖喱農夫包。用錫紙包住嘅大大個農夫包,裡面裝滿豬肉、雞肉或者牛肉等,睇你叫咩肉啦,之後再蓋返埋個包蓋,咖喱汁另上。農夫包外脆內軟,撕開一塊仔,夾埋嚿肉,再點落啲咖喱汁度一啖擺落口,大滿足!



旺角魚片粥  妹記生滾粥品


Photos by mandymanlovefoodie & markleeha123456


呢間粥舖贏就贏在近「魚」樓台,樓下就有魚賣,呢度嘅魚粥感覺上都特別新鮮。同其他粥舖唔同,呢度嘅粥底係用魚湯調製嘅,食落軟綿綿得嚟,仲有啖啖魚嘅鮮甜。如果叫埋魚片或者魚腩粥,就更加感受得到嘞。

啲魚片係就係切得好薄,但係有好多片喎,仲要冇碎骨,方便食用,而且一啲都唔腥。而魚腩呢就好肥美,啖啖肉,就算有骨都係啲好粗身嘅魚骨,怕啃骨嘅朋友仔可以放心,再加埋啲蔥花同薑絲,成碗粥即刻又提昇多個層次!不過,雖然喺度食得返舊陣時粥舖嘅味道,但已經食唔返嗰個價喇,以前廿零蚊一碗,而家要成三十幾四十蚊呀,嗚呀!

灣仔真‧清真咖喱   清真惠記


Photos by kelvinfoodki & wanttoeat


十個有九個食過呢間餐廳嘅朋友,都會推介呢度嘅咖喱羊腩。羊腩有少少羶味,配埋香得嚟唔太辣嘅咖喱汁食,好惹味。咖喱同好多肉類都係朋友,但如果調製得唔好,就好容易搶走晒啲肉味,淨係食到咖喱味,不過呢度就啱啱好,既有羊羶味又有咖喱味,perfect池。

除咗羊腩,牛腩同燒鴨都係同樣嘅出色,唔會太腍又唔會太硬,剛剛好。特別係燒鴨,啲皮燒到脆卜卜,啲肉又好有肉汁,連埋咖喱汁送飯,大大碟都食得晒!最後提一提返,呢間係正宗清真餐廳,冇任何豬肉菜式提供㗎。



大埔炸豬扒  東記上海麵


Photos by 小連 & 極樂食客


大埔熟食中心都幾大,裡面有好多間餐廳,有選擇困難症嘅人應該見到都覺得頭痕,行嚟行去都唔知揀邊間食好。嗱,呢間東記上海麵呢都幾出名嘅,特別係佢哋嘅炸豬扒同炸雞翼。啲炸豬扒大大件,炸到金黃,雖然好熱氣,但對住真係零抵抗力,食咗先算。外層仲有啲脆蒜喺度,令到塊豬扒更加香,食到酥脆嘅外皮,又食到熱辣辣嘅肉身,薄薄地又幾腍。配返配上海粗麵都係個唔錯嘅選擇,麵身煙韌,入口彈牙,不過惟一要挑剔嘅就係個湯底好淡,冇咩味,但唔緊要啦,浸一浸塊豬扒(浸少少好似冇咁熱氣嘛)落去,啲脆香蒜味就溝咗落去喇!

文:Kar

隨時接收最新資訊
讚好OpenRice專頁!

關鍵字
鮮牛蛋包
咖喱
魚片粥
羊腩
上海麵
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【開飯餐廳專訪】日本人在香港 開餐廳最重要健康行先,味道其次(有片)
2017-02-08
【飲食潮流】MOS Burger有咖喱飯食?期間限定原隻軟殼蟹漢堡
2017-02-24
夠麻甩夠地道 元朗4間香口車仔麵店
2017-02-22
【品酒有問】咖喱都可以配葡萄酒嗎?
2017-04-05
泰國名氣宮廷菜抵港 超軟滑三重芝士榴槤撻
2017-03-29
【小不啦嘰1大口】只有泰國才能吃到的味道【街頭香蕉煎餅ROTI】
2017-03-02
餐廳資料
更多
收起
本月熱門
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
甜蜜蜜暑假 7月下午茶推介
6天前
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22