帶媽媽食餐好! 5大母親節中菜推介
2024-04-15

母親節就快到喇,仲頭痛緊帶媽媽去邊度食飯?今期搜羅咗5間餐廳畀大家,有高級嘅酒店中菜同創意粵菜等,想食節日限定餐目或單點招牌菜都得。


頂級食材入饌八道菜晚餐 萬豪金殿  

如果媽媽們鍾情經典啲嘅粵菜,呢間就啱晒喇~米芝蓮星級中菜廳由酒店中餐行政總廚鄧家濠精心設計,糅合傳統同現代元素嘅烹調手法一定能令媽媽留低難忘回憶。八道菜晚餐包括前菜香醋花膠凍,清新開胃;天籽蘭花雪菊花膠燉響螺湯則濃香鮮甜,又帶有淡淡菊花香氣;茶皇香燻雞好滑嫩,茶香令味道更有層次。另有椒蒜元貝、龍蝦粒蟹肉焗釀蟹蓋同六頭鮑魚伴素千層等。

母親節餐供應日期:2024年5月12日


母親節盛宴晚餐 麗晶軒

可以邊欣賞維港海景邊食飯嘅中菜廳,用餐環境一流~母親節盛宴晚餐有黑魚子黃耳凍伴龍蝦百花芋盒,呢味菜式好講究師傅對烹炸時間同火候嘅掌控,芋盒外脆內粉糯,配埋香甜嘅龍蝦好出色!另外鹽燒松本茸爆鹿兒島和牛都唔錯,和牛油脂香濃,簡單調味已經好食。另外仲有脆釀鮮蟹蓋、蠔皇鮑魚伴花膠、頭抽香煎斑柳伴西班牙雲腿同花膠絲雞絲撈蝦籽麵等,盡顯師傅誠意。

母親節餐供應日期:2024年5月11及12日


創意粵菜食府 南坊  

母親節八道菜限定套餐以多款上乘食材如龍躉、溏心南非鮑魚、花膠入饌,夠晒矜貴。精選菜式包括一帆風順大花蝦伴稻庭烏冬,大花蝦彈牙鮮甜,同煙煙韌韌嘅稻庭烏冬好夾;黑蒜蒸龍躉彈牙又惹味,蒜香又唔會蓋過魚嘅鮮味。另有金腿汁火腿溏心南非鮑魚伴花膠同南乳吊燒雞等,套餐更附送餐酒一枝,媽媽一定更滿足。

母親節餐供應日期:2024年5月1日至12日午市及晚市時段 


沸騰波士頓龍蝦 龍味館  

主打多款以龍蝦、海鮮入饌嘅美食,除咗廣東菜式,仲有唔少四川風味小炒,加埋自家明爐燒味以及多款特色龍蝦點心,呢間新店算係性價比高~必食招牌菜沸騰波士頓龍蝦,鮮甜多肉;馳名芝麻吊燒雞皮夠香脆,點埋蒜汁就更惹味。創意點心系列嘅龍肉蝦餃以龍蝦代替鮮蝦,外皮晶瑩剔透,龍蝦肉爽口彈牙。


破格演繹傳統京川菜 木子園  

如果媽媽鍾意食川菜就要試吓呢間!中環全新京川菜食府主打創新京川菜,如新派麻香脆皮牛肋骨選用原條美國牛肋骨,加入香料、薑、蔥、洋蔥、四川豆瓣醬等用慢火先炆煮60分鐘,再加入脆漿炸至外脆內軟,最後淋上秘製麻香醬汁,麻感十足肉質軟腍。紹興酒糟醉雞選用三黃雞,本身酒糟已經增添味道層次,再加入陳年花雕紹興酒浸煮6至8小時至酒香融合入味,香氣恰到好處。週末更推出2小時任食午市半自助餐,可以任食點心、冷盤、湯品同北京填鴨,絕對值得!



文:Yanica
編:Cathy




關鍵字
母親節
中菜
粵菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2024生日優惠】持續更新!5月壽星「天際」慶生+驚喜杯壽司
2024-05-04
東京炭火現烤手工漢堡扒 100%日本牛肉製作 7/5登陸中環
2024-05-02
【隨時更新】零食速報 每周新款零食、酒品點評
3天前
本月優惠大集合 外賣自取指定食品、茶飲$28 片皮鴨24折
2024-04-22
5大人氣海鮮湯沾麵店 特製龍蝦沾麵、番茄蝦湯沾麵
2024-04-23