屯門最新掃街、宵夜熱點!小食街15間餐廳招牌推介(有片)
2019-07-03

屯門掃街新場!呢間商場早前換上全新裝修,最令街坊們開心嘅應該係多咗條小食街,星期五至日仲開到凌晨一點呀。裡面有齊唔同選擇:板燒海鮮、石磨腸粉、章魚燒、糖水、窩夫,甚至係日本廚師主理嘅拉麵!
 


屯門雅都商場重新裝修後改名Go Go Mall,小食街佔地50,000呎,有超過20間餐廳進駐!開飯仔就去行咗一圈,幫大家搵咗15間最啱掃街或者宵夜醫肚嘅餐廳,再睇下佢哋有咩招牌菜。
 

皇牌醉雞卷 醉滋味


(左)慢煮醉雞卷($38),(右)辛香花甲粉($38)

場內最好賣嘅食物之一,慢煮醉雞卷顧名思義係用雞扒先去膏同切筋,慢煮後過冰水,再用雞湯、花雕、玫瑰露浸12個鐘至入味。所以食落雞皮彈牙雞肉嫩滑,酒香突出。無論係當小食、加餸都得,醒大家一個貼士:個醉雞汁第二日拎嚟撈麵食一樣咁得!
 


辛香花甲粉靈感嚟自四川麻辣湯底,不過店主特別按香港人口味調校過,比正宗口味少辣少油,所以而家嘅麻辣平衡啱啱好。而且花甲同粉絲分量夠多,宵夜食最爽呀。
 

貓山王專門店 琛榴槤(老樹)


貓山王芝士撻($25/件,買5送1)

榴槤控一定要嚟呢邊啦,成間舖都以貓山王為主。好似呢個貓山王芝士撻就用北海道芝士加馬來西亞A級貓山王,趁熱食流心效果最好,而且芝士香同榴槤味係無得輸嘅組合!
 


(左)貓山王軟雪糕(未定價),(右)花琛冰($50)

夏天想食凍嘢,亦有貓山王軟雪糕同飲品介紹返。貓山王軟雪糕嘅榴槤味比芝士撻更濃郁,口感似Froyo比較黏身。特別在可以按自己口味加唔同配料,好似有奇異果、蝶豆花、火龍果等唔同味道嘅水果珍珠、同手造雙色芋圓。而花琛冰就係貓山王牛奶沙冰,頂部加上豆腐花同貓山王果蓉,甜得嚟唔會太膩。
 

特色板燒海鮮 舢板燒


(左)鹹蛋黃醬蝦球辣味撈麵($48),(右)板燒海鮮拼盤($88)

店主每日到流浮山入貨,海鮮質素自然有保證。選擇恐懼症人士最啱點返份板燒海鮮拼盤,有齊鮑魚、帆立貝、海虎蝦,用鐵板燒過增添香氣,海鮮本身都鮮味十足!要食平啲啲亦有鹹蛋黃醬蝦球辣味撈麵,撈麵入口先試到鹹蛋香,後面辣勁就嚟,好香口。
 

瀑布忌廉戚風蛋糕 一糖


(左)芒果乳酪忌廉戚風蛋糕($48),(右)日式水果千層蛋糕($48/件)

天水圍人氣甜品店亦開到過嚟,新出嘅忌廉戚風蛋糕系列一拉起紙套後,乳酪忌廉有如瀑布咁流落去,視覺效果滿分!戚風蛋糕口感鬆軟,配乳酪忌廉同芒果粒甜而不膩。而日式水果千層蛋糕會按時令擺唔同嘅水果,呢期就有士多啤梨,而忌廉加入雲呢拿籽,甜味自然。
 

客家石磨腸粉 鋒味屋


鰻魚腸粉($25)(加蛋+$3)

近年大熱嘅石磨腸粉呢度一樣有,為咗做返客家風味,特別用石磨將河源米打成米漿,再加河源古法花生油蒸成腸粉。傳統得嚟又有啲新意,例如配料有坊間較少見嘅鰻魚,原來老闆自己鍾意食,試過之後又覺得鰻魚同石磨腸粉幾夾,就誕生出呢個配搭喇。腸粉帶花生油香氣,口感亦幾滑。可以按自己口味再加菜、金菇或者雞蛋。
 

足料即整章魚燒 章魚燒大師



(左)明太子章魚燒($30/4粒,$38/6粒,$46/8粒),(右)原味章魚燒($20/4粒,$26/6粒,$32/8粒)

人龍店之一,章魚燒粒粒飽滿挺身,外面乾爽裡面濕潤,亦食到彈牙章魚粒。明太子口味有酸酸甜甜嘅沙律醬同微辣鮮香嘅明太子醬,夠惹味。原味就以燒汁味道為主,勝在唔會過鹹。
 

日本廚師主理拉麵 豐樂拉麵


辛辣豚骨拉麵($75)(加味玉+$10) 

由有十五年拉麵店經驗嘅寺田惠一師傅主理,自己獨立開店亦已經有四年,呢間主打九州豚骨拉麵,每日用純豚骨煮10個鐘熬成湯底。而招牌辛辣口味會加上自家調配嘅辣醬、辣油,同辣肉碎,所以辛辣嘅色、香、味俱全,辣度唔算太勁但的確夠刺激。
 


師傅特別提到,日本九州當地文化係加替玉,即係食到一半覺得唔夠飽再加麵。呢度加一次麵都係$8,而且仲可以按你嘅口味調整醬汁分量,想濃啲或者淡啲都得!
 

更多【掃街推介】:
1. 邊行邊食!深水埗掃街6大推介
2. 粉嶺華明小食街新開幕 必試泰式串燒、芝士條、刀削魚麵
3. 青衣掃街新蒲點 超過20間人氣食店進駐長發廣場!

 
日式燒鳥小店 叁嵐



(左至右)雞皮串($8)、雞胸串($8)、雞腿串($8)、雞肝($18)、雞心串($8)、雞腎串($8)、免治雞肉軟骨棒串($15)、雞羽($15)

日式串燒店,主打燒鳥、即係燒雞呀。雞皮先炸後燒,薄脆甘香;雞腿肉燒得啱啱好,彈牙嫩滑;免治雞肉軟骨棒串有一粒粒軟骨口感,加上自家製燒鳥汁夠香口。而且最平都係$8/串,食多幾串都唔會肉赤。
 

即叫即整香甜窩夫 Dear Desserts


焦糖草莓脆脆窩夫($45)

女孩子最愛嘅甜品當然唔會缺席,西式代表有呢間窩夫店,貴精不貴多暫時只賣四款唔同口味嘅即製窩夫。呢個上面就有忌廉、焦糖脆脆、士多啤梨乾、士多啤梨雪糕同士多啤梨Pocky,好豐富!最加分嘅係焦糖脆脆,有焦香、夠脆而唔黏牙。
 

心機港式糖水 椰子媽


烈焰精靈配河粉($33)

中式代表就有呢間港式糖水店,有創意、多選擇又落足料㗎。好似呢碗烈焰精靈配河粉其實係楊枝甘露配椰汁河粉,楊枝甘露底已經好有芒果香,上面仲要擺差唔多三分之一個芒果果肉同唔少西柚果肉,啖啖香甜。椰汁河粉亦非常滑溜,不過就略嫌無乜椰汁味。
 

懷舊風味滷味 滋味館


鹵水拼盤($36)

同樣係港式口味,今次係鹵水!一份拼盤有齊豬耳、雞腳、雞腎、豬潤同生腸,而秘製鹵水就用咗十幾款唔同香料熬製,味道有層次。豬耳同生腸相當爽口,雞腎同豬潤亦夠入味,不過最特別嘅就要數到鹵水店比較少見嘅原隻雞腳,廚師話唔用竹籤,用手成隻食就最有懷舊風味喇。配埋芥末、甜醬同辣醬。
 

有餡雞蛋仔、消暑特飲 雪糕婆婆


鹹蛋雞蛋仔($30) 

掃街小食真係唔少得雞蛋仔,呢間嘅雞蛋仔有唔同口味,包括近年「老是常出現」嘅鹹蛋!雞蛋仔係偏雞蛋糕口感,比較實心。搣開裡面有粒粒香口鹹蛋黃碎,同甜甜地嘅雞蛋仔幾夾。
 


(左)紅豆冰($23),(右)黑雪($28)

飲品就走懷舊路線,好似有冰室常見嘅紅豆冰,不過呢度就將佢打成沙冰,口感細細碎碎咁,甜度適中值得一試。而黑雪就最啱朱古力控,用特濃朱古力粉加牛奶同忌廉,一飲就知同一般凍朱古力唔同!
 

正宗汕尾小食 焗住食


汕尾小米($20/8粒,$24/12粒)

提起小米仲以為係手機品牌?Sorry講嘅係廣東汕尾嘅特色小食呀!用薯粉做皮,趁熱食口感煙煙韌韌,而裡面就係豬肉、豬油渣,再加五香粉同鹽調味,五項食材加埋就係呢碟小米喇。小米本身就夠香,不過當地人會再配蠔油或者辣椒醬提鮮。特別係呢度嘅辣椒醬係店主秘製,唔少人都會食過返尋味!
 

足料大份碟頭飯 彪記小厨


大碗滑蛋吉列豬扒飯($45)

小食街強調「一店一特色」,所以連賣碟頭飯嘅舖頭都有特別之處。最值得推介嘅係呢碗滑蛋吉列豬扒飯,真係夠大碗就不在話下啦,吉列豬扒炸得夠香脆,吸收晒香甜醬汁最啱送飯。而蛋亦算幾滑,撈埋同樣甜甜地嘅洋蔥一齊食,大滿足。
 

大大杯台式飲品 LC-Tea


芝士芒芒($40)

掃完街仲意猶未盡?落一層去返地下仲有呢間主打水果新鮮即切即沖,每日手打芝士奶蓋,同不含果醬、色素或添加劑三大賣點嘅台式飲品店。飲品可以任意配搭唔同水果同茶底,例如芝士芒芒可以免費揀四季春或者茉莉茶底,加錢換其他茶底亦得,得咗。
 





Go Go Mall
地址:屯門屯門鄉事會路112-140號




文、相、片:Cathy

關鍵字
屯門
掃街
小食
宵夜
醉雞
榴槤
板燒海鮮
戚風蛋糕
石磨腸粉
章魚燒
拉麵
新店直擊
走在最前線,為大家搜羅及報道有關新開餐廳的資訊。
餐廳資料
更多
收起
本月熱門
【隨時更新】便利店尋寶 每周新品速報
2019-09-27
尖沙咀新商場開幕 過江龍餐廳一覽
2019-09-20
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19
幾時都要打邊爐!火鍋控必試特色店!
2019-09-24