屢創新「糕」!新年新款糕品巡禮 卡通糕點搶晒Fo
2018-02-02
話咁快又就嚟到農曆新年,呢個日子又點少得食賀年糕點呢?今年唔少舖頭都推出咗各式糕品,要創新有創新,要健康有健康,即刻嚟巡個禮先!
 
布甸狗燕窩楊枝甘露糕 鴻福堂

嚟緊係狗年,呢間舖頭就好應節咁推出咗以布甸狗為主題嘅賀年糕品禮盒同手挽袋。裡面有燕窩楊枝甘露糕同雙重芝士年糕各1個,前者有粒粒芒果肉、金柚、水晶珠同燕窩,食落口感十足。而後者就以車打芝士配上巴馬臣芝士,夠晒「芝」味!

梳乎蛋薑汁年糕 山下菓子

有無人嘅新年願望同開飯仔一樣,都係希望可以日日好似梳乎蛋咁,食完就瞓瞓醒再食呢?呢款禮盒套裝就啱晒你哋啦,裡面分別係梳乎蛋造型嘅薑汁年糕同楊枝甘露糕。造型可愛,送畀人定自私食都得。鍾意食蘿蔔糕嘅朋友就可以留意下另一款用100%日本大根製成嘅蘿蔔糕,食落好鮮甜,而禮盒上嘅包裝都幾盞鬼架。
 
燕窩藜麥藍莓糕 帝京酒店

有無諗過藜麥都可以做賀年糕點?呢間酒店推出嘅燕窩藜麥藍莓糕又幾創新喎。以超級食物藜麥配上滋補養顏嘅燕窩,女士們應該好難抗拒。而發財蠔豉蓮藕糕就夠晒好意頭,裡面有金蠔、髮菜、蝦米同蓮藕粒等材料,食落口感好豐富。
 
黑糖遠年普洱年糕 明閣

年糕就食得多,不過加埋普洱你又試過未先?呢款年糕以黑糖取代蔗糖,再加入來自雲南嘅遠年普洱茶,入口回甘。而同樣係新出嘅富貴南瓜椰汁黃金糕都係另一個比較健康嘅選擇。如果想加啲口感嘅話,食之前仲可以灑啲椰絲喺面添。

如意吉祥甑糕 景樂集團

有追開電視劇《那年花開月正圓》嘅朋友應該會認得女主角最愛嘅甑糕。呢款糕點其實係陝西傳統食物,以糯米、紅棗、紅豆同提子乾等材料製成,再以鐵甑蒸製而得名。味道香甜,而且營養價值高。而今年新出嘅薑汁紫薯年糕都唔錯㗎,薑汁暖胃,仲食到粒粒紫薯添!
部分銷售地點:King Ludwig Beerhall面譜京川料理家傳滬曉
 
金箔杞子桂花沖繩紫薯糕 樂雅軒

送畀人嘅話呢款金箔杞子桂花沖繩紫薯糕就啱晒啦。底層嘅紫薯糕係以日本沖繩紫薯製作,再鋪上以桂花糖、雲南有機杞子同金箔嘅啫喱凍,夠晒矜貴。而百香果芒果十勝紅豆糕入口酸酸甜甜,估唔到又幾夾喎。
 
純素賀年糕點 Green Common

賀年糕點其實都可以好健康嘅,好似呢款紅藜麥蟲草花蘿蔔糕咁,就以零動物成份嘅未來漢堡扒代替傳統臘肉,再加入黑木耳、冬菇、紅藜麥同蟲草花,健康得嚟又好味。而另一款牛肝菌五香芋頭糕就以含有高鐵同氨基酸嘅牛肝菌取代冬菇,配上含豐富膳食纖維嘅芋頭,食多少少都唔使擔心。
 
椰汁椰肉年糕 四季文昌
呢間火鍋店嘅招牌海南椰子文昌雞鍋口碑就唔錯,今年佢地仲出埋年糕!賀年禮盒裡面有椰汁椰肉年糕同臘味瑤柱蘿蔔糕兩款口味各一件。前者選用海南椰子,奶白香滑年糕當中仲有爽口椰肉增加口感層次;後者就用海南瑤柱同惹味臘味搭配香甜蘿蔔,煎香嚟食特別吸引。
  
夏威夷果仁紅棗糕 海景軒
位於尖沙咀嘅呢間酒店中菜館今年玩中西合璧,將夏威夷果仁加到紅棗糕當中,令軟糯香甜嘅紅棗糕更添一份堅果香味同口感。另外仲有大展鴻圖年糕,即係上層傳統椰汁年糕加下層紫心番薯糕,同選用優質臘味炮製嘅瑤柱蘿蔔糕,總有一款啱你心意。
 
至尊奶黃糕 聖安娜

幾個月前食完奶黃月餅,係唔係有少少掛住陣奶黃味呢?今年新年呢間餅店就推出咗全新嘅至尊奶黃糕,入口帶香濃奶黃味同淡淡椰香,就算食多少少都唔會好膩。而芋頭fans就可以留意下呢兩款芋頭糕,分別係至尊山芋芊絲糕同瑤柱芋頭糕,唔知揀邊款好?Why not both ?!
 
同場加映:仁和九孔醬

唔少朋友食糕都鍾意點醬,辣醬xo醬就食得多,不如試下呢一隻來自台灣嘅九孔鮑魚醬啦。每樽大約由十隻九孔鮑魚製成,入口帶鮮味,唔會一味死鹹,用嚟點蘿蔔糕都幾夾。平時亦都可以用嚟炒菜呀,炒海鮮或者撈麵都得㗎。

售賣點:
1. 士多
2. 六堡
地址:觀塘駿業里6號富利工業大廈6樓D室

文:Crystal

關鍵字
新年
年糕
素食年糕
紫薯年糕
賀年糕點
蘿蔔糕
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
迎接全新2020 1-2月下午茶推介
2020-01-06
【特約分享】新年去始創 食盡中、日、國際賀年佳餚
2020-01-13