尖沙咀新開素食自助餐 1.5小時任食40款菜式(有片)
2018-07-27

尖沙咀呢間新店裝修以白色和木嘅簡約風格為主,睇埋裡面白磚牆上嘅「Everyday Veggie, everyday healthy」先知唔係文青Cafe,而係一間素食自助餐廳!午市同晚市都可以任食唔同素食頭盤、沙律、炸物、熱盤、甜品,全部都有標明有無蛋、奶或者五葷,細節睇得出用心!
 


每日坐落尖沙咀山林道,經過唔細睇嘅話真係差啲以為係Cafe。其實係一班年輕人開嘅素食自助餐廳,希望大家多啲嘗試食素。選擇相當豐富,而且有經驗豐富嘅中菜廚師坐陣,唔少熱食同甜品都有驚喜!
 


開飯仔採訪當晚就有頭盤7款、炸物及麵包7款、熱食19款、沙律及水果11款、甜品8款、湯品2款,同飲品4款。每樣都有標明菜式名、係純素定含有蛋、奶或五葷成分。炸物有熱燈,熱盤亦有電磁爐保持熱度,食完嘅菜式Refill速度都合理。
 


紫薯青蘋果沙律球


(左至右)芝麻醬伴菠菜香菇、山藥泥涼拌蔬菜、蒜茸涼拌青瓜、杞子陳醋雲耳

開胃頭盤首選紫薯青蘋果沙律球,紫色圓球似足雪糕球,咬落係Creamy紫薯蓉、青蘋果粒同粟米增添爽甜,微甜清新。四款涼拌菜都係涼食,調味得宜夠醒胃。
 


(左)錦鹵雲吞、(右)香芋絲春卷


椒鹽豆腐


蒜蓉包

素食都有香口之選嘅,錦鹵雲吞皮薄香脆,裡面有雲耳、馬蹄、雜菌、甘筍,最重要嘅食落一啲都唔油膩。另一推介係椒鹽豆腐,豆腐滑溜軟滑,有少少入口即溶感,椒鹽分量啱啱好夠吊味而唔死鹹。蒜蓉包亦夠脆夠惹味。
 


(左)咖喱雜菜、(右)合桃咕嚕肉


黃耳薑蛋醋


豉油皇炒麵

熱盤推介真係唔少!合桃咕嚕肉炸漿同火候都控制得宜,食落香脆唔油,配甜酸汁最啱撈飯食。唔少都食得出師傅用心,好似薑醋咁就特別加入膠質豐富嘅黃耳嚟代替豬腳,令薑醋喺酸辣味道之上增加一份濃稠嘅口感,而且雞蛋夠哂入味!豉油皇炒麵係全素,難得嘅係炒得夠乾爽、無油膩感而且夠味。
 

【無綠不歡Green Monday】:
1. 註冊營養師主理KALE輕食
2. 肉變素的食肆!全港首間
3. 滑到不能想像!純素分子雪糕

 

栗子西米布甸


拔絲香蕉


腰果酥

甜品方面有兩款建議大家趁熱食,第一款係票子西米布丁,富蛋香而且裡面嘅栗子蓉保持一粒粒口感,最加分嘅係唔會過甜,食返栗子天然甜味。第二款係賣相非常吸引嘅拔絲香蕉,裡面嘅香蕉暖暖地甜甜地,同外面嘅糖絲形成一軟一脆嘅口感層次。師傅連甜品都相當用心,連腰果酥都係自家製,腰果香突出,再脆口少少就更完美。
 


沙律及水果


(左)檸檬水、(右)蘋果橙汁

整體嚟講嘢食水準都唔錯,調味唔重有少少家常菜嘅Feel,選擇充足而且有照顧到唔同口味。餐廳免收加一服務費,用完嘅餐具記得擺返去回收點。有需要嘅時候亦有店員細心講解菜式。1.5小時唔會太趕,最後5分鐘店員亦會友善提醒。
 


紅燒豆腐


素燴雜菌


(左)甘筍絲海帶絲油角燉煮、(右)椰香煮南瓜

餐廳亦有積極聆聽客人嘅意見,例如將咖喱雜菜嘅辣度調低,未來亦會進一步減少有五葷嘅菜式比例,希望大家都可以好似句Slogan咁,「Everyday Veggie, everyday healthy」!
 



每日
尖沙咀山林道10-12號山林閣地舖




文、相、片:Cathy

關鍵字
尖沙咀
素食
自助餐
任食
放題
齋菜
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
6天前
日本人氣茶室登陸尖沙咀 招牌Tea Set、甜品推介(有片)
2019-09-25
高CP值火鍋放題 (1)
2天前