日式燒肉店越開越多，尖沙咀呢間新店就主打糅合Omakase概念嘅燒肉套餐，唔單止可以食到唔同部位嘅日本和牛、刺身、時令海鮮、前菜、甜品等等，仲有專人幫手燒肉！單點項目亦有驚喜，好似每日限定供應嘅寶盒，裡面就有以特別切法處理嘅和牛，賣相同質素兼具。
 

三郎。燒肉佔地約3,000呎，裝修以日本風格為主，卡位等以木屏風相隔，仲有個榻榻米房！而如果想享受專人燒肉，就記得要坐吧枱位喇。餐廳供應四款日本和牛：姬路牛、佐賀牛、宮崎牛，同鹿兒島牛。例如拍攝當日用嘅係姬路A5和牛，特色係油脂豐富而且雪花分佈均勻。
 

京洛（和牛醍醐味料理）（$1,280/位）

餐廳推介套餐，一共有八道菜：前菜、季節魚刺身三種、和牛稀有肉七種、海鮮拼盤、酒肴、湯、食事、甜品。
 

前菜：北海道生粟米

季節魚刺身三種：大拖羅、牡丹蝦、帆立貝

和牛稀有肉七種牛：牛里脊肉、內側後腿肉、牛肋條肉、牛舌、牛肋肉、三角腹肉、三筋

值得一提嘅係由專人燒肉，唔單止熟度啱啱好，仲會幫客人安排一個最好嘅順序，例如呢七款牛肉師傅就按油花少至多燒好上碟。當中最特別嘅係牛三筋，係牛嘅前腿肉，位於牛肩後面，霜降雪花分佈均勻，肉味濃郁。部分燒肉亦會加上自家燒肉汁，味道香甜可以帶起肉香。
 

海鮮拼盤：日本翡翠螺、大蝦、鮮白鱔

酒肴：燒日本銀鱈魚、湯、食事：明太子茶漬飯、甜品：水信玄餅

鳥亭（三郎市場豚/雞海鮮料理）（$580/位）

唔食牛嘅朋友就可以點呢款以豚肉同雞肉為主嘅燒肉套餐，一共有八道菜：前菜、雞肉、豚肉、海鮮拼盤、蒸物、湯、食事、甜品。而另一款輪亭燒肉Set同樣係$580，可以食到包括和牛肉五種嘅六道菜。
 

亞波尾雞腿肉、亞波尾雞中翼、鹿兒島黑豚里脊肉、鹿兒島黑豚肋肉

寶盒鑽石肉（每日限量供應5-10份，$398起/100g）

鍾意食唔同特別部位嘅牛魔王可以留意呢個寶盒，皆因每日會有唔同部位和牛肉供應，主要會係赤肉例如拍攝當日嘅肉眼，亦有可能會係後臀肉、牛柳、西冷心等。
 

鑽石係指用Diamond Cut切法，燒嘅時候可以更快鎖住肉汁，同時將肉筋切斷，食落口感更嫩更Juicy。加上以蘋果木煙燻，增添香氣。
 

日本產A4和牛三文治（$298）

近年大熱嘅和牛三文治呢度一樣有，選用A4等級西冷，肉質柔軟細膩，咬落脂香十足入口即溶。可以配黑松露沙律醬，用黑松露迷人香氣帶起和牛肉味。
 

三郎。燒肉
地址：尖沙咀中間道15號H Zentre地下3號舖

文：Cathy
相、片：Tom Li