尖沙咀新打卡台式Fusion Cafe 熊仔早午餐+麻糬蛋餅+雲石拿鐵
2020-05-20

鍾意去Cafe打卡嘅Foodie注意!尖沙咀呢間新店絕對可以滿足大家要求,店裡面有多個打卡點,而且食物有特色之餘又可愛。早午餐有自家製熊仔造型饅頭,多士配麻糬丸子,仲有雲石紋嘅拿鐵、髒髒朱古力等搶眼飲品,絕對要相機食先。
 


花香係同樣位於尖沙咀鳥語嘅姐妹店,以白色同粉紅色為主,雲朵形狀嘅枱,水泥牆配霓虹燈,彩色心心牆等都係打卡位。食物就走台灣Fusion風格,配搭同賣相同樣落足心機。
 


骨膠滿滿熔岩飯($98)

話到明骨膠滿滿,呢碟飯真係有唔少骨膠原㗎!因為喺西班牙黑毛豬滷肉醬汁當中再加入桃膠,桃膠有植物性蛋白質同高纖,有助排毒美顏。
 


醬汁嘅滷水香同豬肉香平衡,口感帶黏但無肥膩感。桃膠本身就無乜味,不過就增加爽滑嘅口感。飯加入薏米同小米,更有咬口亦更高纖維,撈醬汁再配埋溏心蛋食味道啱啱好。
 


花香特色饅頭造型早午餐⁣($128,假日供應)

超萌嘅早午餐!有齊黑松露炒蛋、紫薯條、大啡菇、香腸、時令水果、沙律,炒蛋富黑松露香,紫薯條口感扎實微甜,而拍攝當日嘅水果係焦糖蘋果,焦糖脆面加上清甜多汁嘅蘋果真係無得輸。
 


不過最搶鏡嘅一定係自家製嘅牛奶饅頭喇,立體熊仔造型夠得意,口感帶韌。
 


自家製雙色QQ地瓜球($68)

台灣夜市大熱嘅QQ地瓜球呢度都有得食,而且係甘薯、紫薯雙色,當中以紫薯味比較突出,味道天然香甜。如果口感可以再煙韌啲就更有QQ感覺喇。
 

更多【新店直擊】:
1. 銅鑼灣新開抵食Omakase 日本新鮮空運食材 第二位半價
2. 旺角新開花藝Cafe 豐富全日早餐+明太子貓耳朵+特調有機花茶
3. 灣仔新開濃厚鯛魚湯烏冬 每日鮮熬濃湯 配原隻龍蝦/廣島蠔/蒲燒鯛魚

 

紫薯蛋餅配牛奶麻糬($68)

蛋餅亦係香港人特別鐘情嘅台灣小食之一,呢度就特別創作出唔同口味,例如鹹嘅炸排骨拉絲蛋餅($78),同甜嘅紫薯蛋餅配牛奶麻糬。自家製牛奶麻糬口感軟糯帶牛奶香,同微甜嘅紫薯蓉、黑糖蜜好夾。而蛋餅就煙煙韌韌咁,有少少鹹味,甜鹹甜鹹估唔到又幾夾。
 


粒粒花生醬芝士厚吐司配鮮奶麻糬($68)

選用酥脆嘅丹麥吐司,加上水牛芝士片同花生醬,食落以花生香氣為主。而且花生醬有花生碎喺裡面,所以食起嚟有顆粒感好過癮。鮮奶麻糬今次就變成丸子,口感煙韌,上面再灑上烘過嘅花生碎同煉奶,多重味道層次。
 


(左)竹炭雲石拿鐵 (水泥咖啡)($52/凍),(右)藍色富士山拿鐵($48/熱、$52/凍)

飲品都好啱打卡,竹炭雲石拿鐵利用竹炭粉嘅黑色,同白色嘅牛奶形成雲石紋漸層,搞勻就會變成水泥色,味道帶咖啡烘焙香,相當順喉。而藍色富士山拿鐵嘅Baby Blue配白色,加埋上窄下闊嘅杯真係好似坐迷你富士山咁,甜度適中。
 


髒髒朱古力($48/熱、$52/凍)

以之前大熱嘅髒髒包為靈感,呢杯髒髒朱古力灑滿咗可可粉,朱古力香濃郁,而且飲落無想象中咁甜,一個人飲完都唔會太膩。
 






花香
地址:尖沙咀河內道18號K11購物藝術館B2樓201號舖




文:Cathy
相、片:Tom Li

關鍵字
尖沙咀
Cafe
骨膠滿滿熔岩飯
All Day Breakfast
牛奶麻糬
花香
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22