尖沙咀人氣泰菜館翻新重開 全新Menu更多地方美食(有片)
2019-06-19

呢間嚟自曼谷,2011年進駐香港嘅人氣地道泰國餐廳,尖沙咀店最近經過翻新重開。唔單止環境更舒適,Menu亦加入更多泰國唔同地區嘅菜式,風味各異又有新鮮感。配埋各款創意特調再望住個海景,真係「泰式」嘆!
 


Mango Tree尖沙咀圓方店已經完成翻新工程,保留招牌「芒果樹」木造立柱,配合樹木為主嘅擺設及枱櫈。牆上就以芒果花圖案做裝飾,呼應返呂宋綠色嘅雲石吧枱。
 


青芒果燒雞沙律配黃金糯米飯($128)

環境翻新之餘,菜單亦有唔少新菜式,其中一個就係呢份青芒果燒雞沙律配黃金糯米飯,雞肉搽過蜜糖、麥芽糖及多款泰式香料後用炭火烤肉,皮脆肉嫩、相當入味。青芒果沙律就酸辣十足,另一亮點係加入鹹蛋黃再炸嘅黃金糯米飯,外脆內糯又香口。
 


辣椒膏原隻帶子($228)

喺泰國中部、曼谷等地常見嘅菜式,原隻大大粒帶子加泰式辣椒膏、洋蔥、甜椒等一齊炒香。帶子保留嫩滑鮮甜,辣椒膏唔算太辣,反而帶起帶子嘅鮮甜同洋蔥等配料嘅辛香。所以呢道菜望落好似係重口味,但食落係意料之外嘅甜辣醒胃!
 


黃咖喱炒阿拉斯加蟹腳($538)

將店家招牌菜式黃咖喱炒蟹「升呢」變成用啖啖肉嘅阿拉斯加蟹腳!黃咖喱沿用泰國店配方,用咖喱粉、鮮椰奶、辣椒膏、雞蛋等材料烹調而成,香料香同蛋香兼具,濃稠嘅咖喱汁加上鮮甜彈牙嘅蟹肉,絕對係必點。
 

更多【飲食潮流】:
1. 瀨尿蝦壽司+瀨尿蝦濃湯 尖沙咀日本米芝蓮二星壽司店新菜單
2. 必食米芝蓮星級茶漬飯、日本水魚煮湯 佐賀主題居酒屋重開
3. 【隨時更新】便利店尋寶 每周新品速報

 

泰北亨利鴨($188)

同樣係全新菜式,用嘅係泰國北部清邁著名嘅亨利咖喱,特色係唔放椰漿,反而加入菠蘿緩和咖喱嘅辣味,所以食落比一般咖喱清爽。當地會用亨利咖喱煮豬腩肉,呢度就改為煮比較瘦嘅鴨肉,口感軟腍而且吸盡咖喱香。
 


泰式甜品拼盤($198)

一份就有齊多款泰式甜品!香芒糯米飯用香氣清新嘅泰國水仙芒,糯米飯上有椰奶同少少鹽,降低甜度亦更有地道泰國特色。泰式班蘭千層糕一層層綠色同白色分別係班蘭同椰汁味,香甜軟糯。

椰汁西米糕用班蘭葉包住,椰汁忌廉下面有芋頭粒、粟米粒等,口感豐富。翡翠西米丸子當中嘅西米亦係用班蘭葉染色,外面再加一層椰絲,一粒粒咁嘅口感都幾特別,而且甜而不膩。
 


(左)Rose Apple Delight($70),(右)Thai Sangria($80)

Thai Sangria特別用泰國番石榴配搭士多啤梨、柚子,再加Sauvignon Blanc白酒、橙汁同芒果蓉,果味濃郁之餘亦唔會蓋過白酒特別嘅草本香。而Rose Apple Delight係無酒精,用蘋果加上玫瑰糖漿調配出粉紅色又易入口嘅Mocktail。
 






Mango Tree
地址:尖沙咀柯士甸道西1號圓方(Elements)2樓2032號舖




文、相、片:Cathy

關鍵字
尖沙咀
圓方
泰國菜
黃咖喱
Mango Tree
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】零食速報 每周新款零食、酒品點評
4天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12