充滿台灣淡水老街風味嘅古早味蛋糕，唔使買機票搭飛機先食到喇，搭轉過去尖沙咀就得！因為曾經去過台北進修烘焙嘅馬來西亞籍師傅，將呢個熱爆當地嘅蛋糕帶咗嚟香港呀，仲不停由舖頭度飄啲蛋香味出嚟，行過都聞到。

所謂古早味，即係傳統嘅味道咁解，所以蛋糕用材都唔多，就5種：新鮮農場雞蛋、麵粉、牛奶、砂糖、菜籽油，經過攪勻、打發等過程，再放入焗爐烤焗80分鐘就食得。用最原始最簡單嘅食材整出嚟嘅蛋糕好鬆軟，無論聞定食，都有好香嘅蛋香味。每個5吋闊，四四方方咁，又叫做枕頭蛋糕。

除咗原味之外，仲有芝士味。製作嗰陣，師傅分咗兩次落芝士㗎，營造雙層嘅感覺。雖然拉絲效果就冇嘅，但芝士呈半融狀態，食落鹹鹹地咁都幾唔錯。

另外，仲有隻係香港先有嘅限定口味：鹹蛋！切開就會見到好多橙黃色嘅鹹蛋黃，未食先興奮。啲蛋黃都算分佈得幾平均，點切都有，唔使爭。

舖頭噚日開始試業，三個焗爐每轉夾埋可以出到90個蛋糕，而第一日就賣咗近300個喇。不過佢哋暫時都未有固定嘅出爐時間，想試嘅朋友去到碰碰運氣啦~

再溫馨提示多次，今個星期六嘅中午12點鐘，佢哋會送出100盒蛋糕，先到先得呀！ 

占師傅 
地址：尖沙咀加拿分道4-6號集友大廈地下6號舖

文、相：Kar