尖咀人氣過江龍拉麵店 季節限定香濃龍蝦沾麵配海膽汁(有片)
2018-03-06

1月中嗰陣咪有間日本過江龍拉麵店喺尖沙咀試業,然後日日大排長龍嘅~ 相信呢條人龍短期內都唔會消失住喇,事關佢哋日前正式開業,宣佈今個季節限定嘅沾麵,係龍蝦沾麵呀!!!仲有得配埋海膽汁添!

呢個龍蝦沾麵,原隻新鮮波士頓龍蝦上都不在話下,隻龍蝦仲要加咗芝士,再即場用火槍燒過,半溶得嚟又香口,而且仲有些少辣辣地。

湯底當然係成碗沾麵嘅靈魂,用咗大量嘅龍蝦去熬製嘅龍蝦濃湯,再混合埋以鮮雞熬咗8個鐘,同時結合4種上乘魚乾嘅魚介風味雞湯而成,所以味道相當香濃同鮮甜。至於麵條屬於粗麵,掛湯嘅能力都唔錯。

根據餐廳社長及創辦人坂本幸彥先生嘅專業推介,最好就喺10分鐘內食呢碗沾麵啦,夠熱夠鮮嘛(真‧日本人食得仲快呀)。咁點食?有幾種食法嘅,建議首先咩都唔好點,就咁食兩三條麵條,咁先可以試到佢最原始、最真嘅味道。啲麵粉係由日本入口嘅,每朝喺餐廳度新鮮製作,再用冰水過冷河,煙韌彈牙。

然後就可以夾麵條浸湯食,咁就可以食到龍蝦同魚介嘅鮮味,第三種食法就係淋少少海膽汁喺碗麵度,撈勻佢食,即刻又係另一種風味,鹹鹹地咁。記得唔好一次過落太多喎,如果唔係就會太鹹喇。最後就可以將沾有海膽汁嘅麵再浸湯咁食,層次又再豐富咗。食食下食到碗湯凍咗都唔緊要嘅,餐廳有加熱服務呀。食晒都仲有湯汁淨喺度,唔好嘥,加埋熱魚湯就可以飲晒佢喇~~ btw留意返,龍蝦沾麵係每日限量供應㗎。

 濃厚魚介沾麵

 濃厚魚介拉麵

 芳醇鹽味拉麵

除咗限定沾麵之外,menu上另外仲有幾款拉麵同沾麵,包括濃厚魚介沾麵、濃厚魚介拉麵,同芳醇鹽味拉麵。其中,芳醇鹽味拉麵係用以低溫慢煮嘅方式,將新鮮雞熬成清雞高湯,精華濃縮晒一齊,配埋鹽味嘅秘製醬汁,係幾香嘅。食到中段仲可以加埋盛干貝醬汁,味道又會有啲變化。

嚟到唔止食麵,仲食埋景添呀,坐窗邊就可以望住維港海景咁嘆拉麵喇,你都咪話唔疏乎呀。


 (左)香港區負責人 Ivan、(右)社長及創辦人 坂本幸彥先生



麵屋一燈
地址:尖沙咀廣東道3-27號海港城海運大廈3樓LCX 32號舖


文、相:Kar


關鍵字
尖沙咀
拉麵
沾麵
日本菜
期間限定
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
1天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18