將軍澳新開素食店 刈包、牛肉粉現東南亞風味(有片)
2017-11-14


素食文化愈嚟愈普遍,素食嘅餐廳亦愈開愈多,將軍澳最近又開咗一間,仲首次推出以中式手法製作嘅未來漢堡扒。除咗有堂食用餐嘅位置,亦有其他素食食材同零食嘅售賣區,更加係首間設有「無包裝銷售區」嘅分店,鼓勵大家「裸買」,相當環保!

素食朋友可能早有聽聞呢間餐廳嘅「未來純素漢堡」,但佢哋今次一改過往西式嘅作風,改為用中式手法炮製,賣相就好似台灣嘅刈包咁。刈包口感鬆軟,中間夾住用beyond meat打成嘅肉碎、青瓜絲同芝麻,肉碎喺製作時已經混入咗菜脯、磨豉醬、麻酒等調味。

而「足甘筍漢堡」亦係新店新推嘅款式,中間塊「漢堡」就係以甘筍作主要食材,再加入純素芝士、豌豆蛋白、洋蔥、粟米等,係幾fresh嘅,不過甘筍味略嫌唔夠突出。

越南菜都有!越南特色嘅牛肉粉,啲牛肉都做得幾像真,外形同口感都似,不過就係全素牛肉嚟。湯底當然都係用全素湯包啦,加埋香茅、南薑等,幾有風味。

另一款富有東南亞特色嘅菜式就係冬蔭公湯。色澤上同樣都係鮮橙,以豆干、冬菇、南薑、香茅等香料嚟代替咗平時嘅海鮮,酸酸甜甜咁,都幾開胃。

天氣開始轉涼,食完嘢飲返啲熱飲暖下身養下生都好。介紹返,接骨木花養生茶,內有桂圓肉、棗片、黑枸杞、接骨木花蜜等,具補血氣功效之餘又有助調經止痛,女生首選啦要。有機薑黃茶飲之前輕輕攪勻,味道甘香,唔算太苦澀,有行氣活血嘅功用呀。

零食方面,羽衣甘藍脆片同泡芙等都值得一試呀。前者有芝士同香蔥奶油兩種味,幾脆口;而後者亦有椰菜花、車打、抱子甘藍等味,但就偏淡少少嘅。

至於上面提及過嘅裸買,就係舖頭有三部果乾同果仁嘅機,可以自助撳出嚟嘅,最好就梗係有自備器皿裝啦,一嚟環保啲,二嚟唔使用舖頭嘅袋嘅話,就可以減1蚊喇。

Green Common
地址:將軍澳唐德街9號將軍澳中心地下G05號舖
備註:暫時先開放零售區,餐飲區預計本周內開業

文、相:Kar


關鍵字
將軍澳
素食
健康
漢堡
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
2天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18