將軍澳中心最近翻新重開，裡面有成36間餐廳，唔少都係全新品牌！包括Chocolate Rain主題藝術親子餐廳，創新前「舖」後「居」概念嘅日本菜餐廳，台灣人氣品牌香港首間分店，藝人黃美棋開嘅台灣菜餐廳等等，最啱一家大細享受親子時間，或者同朋友去聚餐呀。
 

平民價試創意牛肉菜式　MOO Beef Cafe

以摩登牛仔做主題，環境寬敞而裝修又有玩味。主打以牛為主嘅菜式，好似近年大熱嘅吉列牛扒三文治、流心效果出色嘅流心牛角包、平價迷你威靈頓牛柳，同多款以乳酪或牛奶為主嘅特飲。
 

牛頭包牛尾（$68）

真身係牛角包包牛角湯，用法國進口酥皮每日新鮮製作嘅牛角包，包住用牛尾慢煮超過10個鐘嘅燴牛尾同湯汁，一切即見緩緩流心效果，視覺效果一流！
 

記得上枱後盡快享用，如果唔係酥皮就會吸收晒啲湯，流心效果無咁彭拜之餘，牛角包會變得太腍啊。牛尾非常軟腍入味，湯亦濃稠香滑。
 

安格斯牛扒三文治（$128）

吉列牛扒三文治係近年大熱，呢度走親民路線，所以用澳洲安格斯西冷牛扒代替名店常用嘅和牛，當然係就係無咁入口即溶，但牛香亦相當突出。而且吉列半熟牛扒口感外脆內Juicy，絕對值得一試！
 

吉列牛扒外面係用洋蔥、茄汁、蛋黃醬等調配嘅日式醬汁，酸甜當中帶少少辛辣感。外面嘅牛油方包亦烘至金黃酥脆，口感層次豐富。
 

MOO犇（$128）

心大心細唔知點揀，或者兩三人嘅小型飯局就最啱點呢個拼盤，一份有齊迷你威靈頓牛柳、迷你牛肉漢堡，同芝士飯團！迷你威靈頓牛柳雖然細細件，但廚師要花嘅心思同時間一樣多：煎封牛柳鎖住肉汁後加上法芥醬同黑松露蘑菇醬，用酥皮包好再焗，達至酥皮香脆牛柳嫩滑，黑松露蘑菇醬更提升牛肉香味。
 

迷你牛肉漢堡用嘅係餐廳自家製手工漢堡扒，配上香濃車打芝士，香味濃郁。最後芝士飯團用嘅係比較柔軟嘅水牛芝士，飯糰炸至外脆內軟。廚師建議大家可以按威靈頓牛柳、漢堡、飯團呢個次序去食，感覺會無咁膩唷。
 

香芒辣椒布朗尼蛋糕（$58）

甜品亦有驚喜，係咪無諗到喺蛋糕上面見到辣椒呢？其實上面紅色嘅辣椒絲唔多，同酸酸甜甜而柔軟嘅芒果芝士蛋糕、同口感比較實而富朱古力香嘅布朗尼一齊食嘅話，係啱啱好嘅辛辣刺激感！而且令整體唔會太甜，味道平衡。
 

火龍果香蕉奶昔（$42）

唔少飲品都加入牛奶或者乳酪，好似呢杯就係有搶鏡漸層嘅火龍果香蕉奶昔，火龍果有淡淡清香，以香蕉甜味為主，口感厚滑。
 

台灣手工關廟麵專門店　老媽拌麵

台灣人氣拌麵品牌首間海外分店！主打古法手工嘅日曬關廟麵，無防腐劑，口感Q彈有嚼勁。餐廳有多款拌麵、湯麵、台式小食同飲品選擇，麵類可選擇關廟刀削麵或關廟細麵，台灣廚師亦特別嚟香港店監察品質。
 

川味紅燒牛肉麵（$72）

牛腱經過慢火滷製非常入味，牛肉柔軟牛筋彈牙，香嫩又爽口。川味湯底就加入花椒、八角、辣椒等香辛料熬製，味道香辣，但略嫌蓋過紅燒香味，層次不足。關廟刀削麵彈牙掛湯。
 

老成都擔擔麵（$52）

碗底放咗品牌用花椒辣油、醬油同芝麻醬等自家調配嘅成都麻辣醬料，加上鹵水肉碎同糖心蛋，撈勻後夠晒香口，麻辣度其實唔算太高。關廟細麵滑身而唔會太軟，而且掛汁效果亦唔錯。
 

滷牛腱（$42）

小食當中以台式十三香滷味同麻辣滷菜，比較特別，例如滷鴨舌、百頁豆腐、麻辣鴨血等，幾有台灣夜市Feel。單點滷牛腱同川味紅燒牛肉麵嘅一樣入味，少咗分麻辣味道，口感就更彈牙。
 

酥炸甜不辣（$32）

台灣嘅甜不辣泛指炸魚糕，外面金黃香脆，裡面香Q彈牙。呢度嘅酥炸甜不辣就做到呢個口感，而且夠乾身唔油膩，點少少甜辣醬更惹味。
 

冬瓜檸檬（$24）

飲品亦以台灣風味為主，冬瓜茶加上檸檬汁，酸甜清新，夏天凍飲可以醒胃！
 

親子餐廳嘆星級料理　Chocolate Rain Forest

香港設計師Prudence創立嘅藝術品牌Chocolate Rain開設首間親子主題餐廳，佔地4,000呎，結合遊樂區、藝術工作坊，同由米芝蓮餐廳星級大廚主理嘅美食。
 

Eat & Play Set 茶點連飲品

收費方面主要分兩種，Eat & Play Set包括甜點連飲品同遊樂區2個鐘任玩，$180親子同行（成人一位及10歲以下小童一位）。茶點每日製作並更換款式，好似開飯仔採訪當日就有意式牛腩藜麥飯配小米、火腿芝士三文治、士多啤梨馬卡龍、杏桃果醬捲蛋、意大利雲吞配雞湯。用品牌拼布木屋仔奉上好可愛！
 

而且茶點非常用心，好似意式牛腩藜麥飯配小米香味十足，令小朋友可以接觸到藜麥、小米呢啲營養價值較白米高嘅食材；杏桃果醬捲蛋因為係灰色有小朋友誤會係石頭，但食落非常鬆軟香甜有驚喜；士多啤梨馬卡龍、意大利雲吞等都係由大廚每日新鮮製作。
 

Grand Set 茶點連飲品

Grand Set包括甜點連飲品、遊樂區2個鐘任玩、工作坊、禮品包，$368親子同行（成人一位及10歲以下小童一位）。因為玩嘅項目多咗，茶點數量就減少至三款：分子焦糖燉蛋配意大利雪糕，手工曲奇，同手工蛋白糖。
 

分子焦糖燉蛋係打入大量空氣，令燉蛋保留Creamy之餘更輕盈，加上係以低糖低脂嘅配方製作，令各位媽媽可以嘗甜但唔使怕肥。分子焦糖燉蛋上面加上Crumble，下面係每日唔同口味嘅意大利雪糕，口感層次豐富。
 

手工曲奇（$80/盒）

手工蛋白糖（$30/盒）

手造曲奇同手工蛋白糖都係每日新鮮製作，亦係低糖配方，加上罐上有Fantina可愛圖案，食完留嚟紀念都好！
 

遊樂區有彩虹波波池同特大蘑菇屋彈床，餐廳門口亦有4米高嘅充氣Fantina，打卡得畀小朋友放電亦得。工作坊方面既有手作類，亦有STEM主題，適合唔同年紀嘅小朋友發揮自己創意。
 

日本酒品酒機+前「舖」後「居」概念　穴の酒販　

同樣係新品牌，睇餐廳可能已經估到係以日本酒為主，前「舖」後「居」意指店前半係日本酒舖，後面係可以享受多款美食嘅居酒屋。
 

日本酒品酒機體驗（$30/30mL）

知道香港人對日本清酒未必熟悉，呢度特設一部品酒機，用指定溫度儲存八支店家推介清酒同果酒，聽完店員介紹後，大家可以用$30/30mL嘅價格試飲。試到啱心水買一支嘅話，之前試酒嘅$30仲可以扣返㗎。
 

（左）天領·純米夏生貯藏（$480/720mL），（中）半生瓜·純米大吟釀（$680/720mL），（右）十四代·Black Label（$3,000/720mL）

店裡面有過百款日本酒點揀好？開飯仔搵店員推介咗呢三支比較特別嘅清酒。天領·純米夏生貯藏本來係東京限定，呢間店獨家引入咗500支，唔單止Pop-art包裝特別，清酒味道清爽，非常啱夏天享用。

半生瓜·純米大吟釀精米步合達55%，取名半生瓜係因為回甘味道有啲似苦瓜，酒香清新，適合配海鮮或者刺身。酒標全黑嘅十四代·Black Label係高木酒造同前日本國腳中田英壽合作推出，有清酒界嘅Lafite之稱，酒香淡雅，有荔枝、芒果果香同淡淡米鮮味，酒體絲滑。
 

雜錦魚生丼（開張特價$98，原價$178）

Lunch Set夠高CP值！最抵嘅一定要數到呢個做緊特價嘅雜錦魚生丼，魚生會用當日新鮮款式，海膽亦會按時令改用唔同出產地，保證啖啖享受緊海洋鮮甜味！而且一碗有超過10款配料，好豐富。
 

迷你丼物餐（$158）

迷你丼物餐包括沙律、前菜、自選迷你丼飯兩款或自選迷你丼飯一款及串燒兩款、熱烏冬或蕎麥麵，同甜品。好似呢Set就係三色魚生飯、燒牛舌同北海道太子貝，細食嘅女士們可以考慮Share嚟食！
 

海膽魷魚卷（$128）

呢度亦有唔少創意菜式，好似呢碟冰鎮加上食用花裝飾嘅海膽魷魚卷，用魷魚刺身包住生海膽，賣相有啲似炸兩但口感完全唔同，外滑內軟，鮮味十足！
 

鹿兒島黑豚半熟蛋（$38）

而居酒屋又點少得串燒呢？呢件用鹿兒島黑豚肉包住半熟雞蛋，一切開就有爆漿效果，最啱鍾意相機食先嘅Foodie們呀。而且燒過嘅黑豚肉有脂香而唔膩，加上蛋香相輔相成。
 

名古屋雞腿肉（$42）

蝦膠釀日本青椒（$38）

餐廳選料亦非常講究，串燒有鹿兒島4%奇跡之牛、名古屋雞肉、廣島蠔、北海道帆立貝等等，喺香港都可以食盡日本各地精選美食！
 

MOO Beef Cafe位於一樓Food·Park，當中仲有其他話題新餐廳進駐，包括藝人黃美棋投資、主打台式車仔麵嘅台式餐廳大茶飯，同以東南亞風味為主題嘅紫蝶花。地下新開嘅樂天皇朝仲有獨家新品黑糖流沙小籠包！
 

MOO Beef Cafe
地址：將軍澳唐德街9號將軍澳中心L1樓137C號舖
 

老媽拌麵
地址：將軍澳唐德街9號將軍澳中心L1樓133號舖
 

Chocolate Rain Forest
地址：將軍澳唐德街9號將軍澳中心地下G32號舖
 

穴の酒販
地址：將軍澳唐德街9號將軍澳中心地下G27-28號舖
 

文、相、片：Cathy