都話觀塘工廈臥虎藏龍，最近就有呢間人氣IG店新開嘅餐廳，供應各式西餐同甜品，最特別係每日有10款千層蛋糕，由創意奶蓋、香蕉朱古力脆脆，到Light啲嘅伯爵茶等唔同口味都有。主菜都有水準，而且全日供應套餐夠抵食！
 

Call Me Chef之前喺Instagram賣蛋糕為主，日前喺觀塘蛋糕工場同棟工廈開設餐廳，半開放式廚房令食客可以見到主菜製作過程，透明度高又增加互動。
 

草莓奶蓋千層蛋糕（$32/件）

餐廳點少得品牌招牌千層蛋糕？每日至少有10款口味選擇，週末會有更多！比較特別嘅有呢款士多啤梨奶蓋，奶蓋用Cream Cheese、士多啤梨果醬、海鹽等製作而成，食落甜中帶鹹又有奶香，真係幾似飲品嘅奶蓋！約18層班戟皮當中夾住士多啤梨忌廉同士多啤梨果肉，果肉酸酸甜甜咁夠清新。
 

香蕉朱古力脆脆千層蛋糕（$32/件）

甜魔一定鍾意嘅口味，班戟皮當中夾住朱古力忌廉、香蕉片同朱古力脆脆，忌廉甜度適中而富朱古力香，香蕉同脆脆增加味道同口感層次，好過癮！每件千層蛋糕約6-7cm高，部分無夾餡嘅口味，例如伯爵茶會有24層班戟同忌廉。班戟皮都夠薄，同忌廉比例得宜，所以用叉亦輕易切出整齊切口。
 

Call Me Chef全日早餐（套餐$98）

除咗甜品，呢度亦供應唔同款式嘅主菜，包括唔少香港人去Cafe最愛點嘅All Day Breakfast 。忌廉黑松露炒蛋用湖北蛋加忌廉炒至半熟後再加黑松露醬，口感滑溜富黑松露香味；蘋果豬肉腸有蘋果甜味同豬肉香，口感軟腍。炒白菌香口Juicy，炸薯餅外面香脆裡面保留薯仔一粒粒嘅口感。封煎蕃茄、煎煙肉、茄汁焗豆、沙律都有水準。
 

 

經典卡邦尼意粉配63度慢煮溫泉蛋及香脆煙肉（套餐$88）

卡邦尼意粉亦係人氣主菜之一，溫泉蛋蛋黃流心效果唔錯，加上Creamy嘅卡邦尼醬汁亦夠多，令每一條意粉都可以沾上醬汁同蛋汁。有煎煙肉同煙肉脆脆，香氣十足又有豐富口感。醬汁仲有白菌同洋蔥粒，增加香氣同少少辛辣刺激。套餐包埋是日沙律、餐湯、意大利雪糕球同特色飲品，全日供應夠抵食！
 

特盛水果茶（套餐飲品，單點$38/杯）

用西瓜、蘋果、橙、藍莓、熱情果等水果配搭四季春茶底，味道以熱情果為主，香甜清爽。
 

Call Me Chef
地址：觀塘開源道60號駱駝漆大廈3座4樓T號舖

文、相、片：Cathy