太子蜜瓜飲品專門店 200g日本蜜瓜奶 即叫即製
2020-02-24

幾時都話要食多啲生果,保持身體健康最緊要!喺人人都爭開珍奶店嘅年代,太子有間小店則以蜜瓜做主打,提供多款由日本蜜瓜以及其他新鮮生果製作嘅果汁同果奶!

小店上年11月左右開業,餐牌上嘅選擇暫時唔算好多,蜜瓜嘅佔咗三分一,分別有蜜瓜汁、蜜瓜奶同蜜瓜椰奶。全部都係以每日新鮮運到嘅日本靜岡蜜瓜製作。最受歡迎嘅係蜜瓜奶,一杯就用上200G真‧蜜瓜肉,加埋明治鮮奶,即叫即製,打完出嚟面層仲有少少似沙冰嘅口感,有少少蜜瓜肉咬到,整體感覺清甜香滑,果味濃郁。

老闆表示以蜜瓜做主題嘅舖頭喺香港較少見,希望可以做到間專門店。而且即使使用貴價嘅食材,都盡量想做到普及價,令大家食得開心啲。呢杯500mL嘅日本蜜瓜奶,$33,價錢公道。

另一杯望落都係青BB嘅係牛油果奶,選用智利出產嘅牛油果,打出嚟嘅口感比較creamy,甜度適中。牛油果有多種維他命、蛋白質同鈣質等等,係高能低糖嘅水果,既可以美容亦可以降低膽固醇等等,有益健康,難怪近年成為大家嘅新寵兒。

至於藍莓奶則酸甜可口,仲有粒粒藍莓籽咬得到。

熱飲嘅黃金粟米奶則係坊間較為少見,聞落有好香嘅粟米味,飲落則相對較淡身,但仍不失香甜味。

最後要特別推介呢度嘅紅棗薑母茶,連個薑茶膽都係自家製㗎!好有誠意呢~ 每日混埋薑母、黑糖、紅棗等煲一個鐘,啲薑仲要係連皮嘅添,所以杯薑母茶都特別有薑味,辣辣地好暖胃。滲有陣陣黑糖嘅微甜,有種住家嘅感覺。

蜜瓜爺爺
地址:太子界限街12號地下A號舖

文、相、片:Kar

關鍵字
太子
水果
果汁
蜜瓜
健康
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
1天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
5天前
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12