太子站附近新開咗間小食店，唔少出品都係自家製同即叫即做，啖啖食得出心機。好似慢煮再即煎嘅單骨雞翼夠哂惹味，八色餃子更加係每日手工包，口味選擇仲好有驚喜！
 

單骨雞翼（八件 $30-$38）

咕嚕咕嚕主打特色小食，好似將香港人最愛嘅小食雞翼先慢煮兩個鐘入味，炸香後收到Order就會加入唔同調味再煎香，單骨雞翼唔單止更方便食，亦會掛上更多醬汁更香口！
 

（左）黑糖麥芽麥汁雞翼，（右）叻沙麻辣雞翼

六款口味當中開飯仔揀咗最受歡迎嘅黑糖麥芽同叻沙麻辣兩款雙拼，前者加入黑糖漿、麥芽糖同小麥汁，煎嘅時候令雞翼均勻掛上醬汁，放涼後會有少少脆皮嘅效果！黑糖香突出，加上麥芽糖食落相當香甜。後者有咖喱叻沙醬、麻辣汁同香茅，叻沙醬嘅香料香加上少少麻辣，食落非常惹味！上面再加蒜蓉同紫菜，一個字：香口到無得輸。
 

八色餃子（湯餃每份 $28-$30）

八色餃子係小店另一個招牌推介，八種顏色八款口味，全部都係每日手工包，有五款鹹味同三款創新甜食！
 

麻辣海鮮餃、特濃雜菌餃、南瓜芝士魚肉餃、青汁餃、黑松露忌廉餃

先介紹五款鹹食口味先，淺啡色加咗菌汁做餃子皮嘅係特濃雜菌餃，咬開係雜菌、牛肉同白菜，以菇菌香為主。黃色南瓜皮嘅係南瓜芝士魚肉餃，裡面有芝士魚肉，口感彈牙但略嫌芝士味唔夠突出。青色自然係青汁餃，放心青汁加落餃子皮煮熟後草青味無哂，裡面係豬肉、白菜同羽衣甘藍，味道清新唔膩。
 

（左）麻辣海鮮餃，（右）黑松露忌廉餃

紅色嘅麻辣海鮮餃餃子皮加咗蕃茄，裡面係蝦同豬肉餡，麻辣味都幾香。而黑松露忌廉餃最有驚喜，黑麥餃子皮包住豬肉、黑松露、芝士同忌廉，黑松露味相當明顯，加埋豬肉香非常夾！
 

粒粒紫薯餃、抹茶紅豆糯米餃、芒果糯米餃

鹹食餃子會配湯底，甜嘅亦會加返糖水。三款都有糯米增加煙韌口感，紫色嘅粒粒紫薯餃最討好，紫薯蓉甜味自然又夠軟綿。綠色嘅抹茶紅豆糯米餃就主要以紅豆蓉嘅甜味為主，抹茶餃子皮帶淡淡茶香。黃色嘅芒果糯米餃就係芒果餃子皮包糯米、椰汁同芒果，不過唔知係咪唔係好慣熱食芒果，開飯仔就覺得比另外兩款口味稍微失色喇。
 

 

手切三色薯條（$28）

又一款心機出品，三色即係薯仔、番薯同紫薯，都係人手切成粗條再炸！所以食落外脆內棉，而且仲食到食材本身嘅味道，特別係橙色嘅番薯甜甜地非常討好。薯條有三款醬畀大家揀：蟹黃、鹹蛋同黑松露醬，開飯仔試嘅係鹹蛋醬，有沙沙口感之餘鹹味仲啱啱好，Highlight位係有少少咖喱醬吊味，非常香口。
 

手工車仔麵（兩餸 $28）

每日清晨六點就開始自家製麵！所以呢度單係自家手工麵就有五款選擇，都係用天然烘焙蔬果粉製成，唔加任何防腐劑。比較特別嘅有艾葉同桑葉，今次就試咗桑葉，果然食得出有陣特別嘅香，帶少少甘味。而湯底暫時有四款，柴魚鮮魚比較淡，有少少魚鮮味。蟹皇湯底就會惹味啲同香啲。
 

桂花蜂蜜（單買$12）

食咗啲熱氣惹味小食，最後飲返杯甜甜地嘅桂花蜂蜜潤返下就啱哂喇。由小食到車仔麵都的確食得出佢地嘅用心，以後喺旺角想掃街，不妨好似開飯仔咁自己帶埋食物盒同餐具，行遠少少嚟呢邊試下吖。
 

咕嚕咕嚕
旺角太子道西102號地下A3號舖

文、相、片：Cathy