返鄉下成日都會食下嘅關東煮，返到嚟香港有時想食又唔知去邊樹搵。以後知啦~ 銅鑼灣新開咗間關東煮專門店呀，用日本直送食材，由日籍主廚親自處理，以後做嘢做夜咗，宵夜都有著落喇。

關東煮即係將白蘿蔔、竹輪卷、雞蛋等食材放入以醬油同昆布等熬製嘅高湯度燉煮而成，醬油嘅味道會因應地區而有所分別，關東區主要嘅係偏濃郁重味嘅濃口醬油，而關西區就係高湯顏色較淺，味道較清爽嘅薄口醬油。呢間新店提供嘅係關西特色嘅關東煮，個湯底用鯖魚同「本枯れ節」兩種「鰹節」去熬製，清得嚟亦有魚香，更能突出各種食材嘅鮮味。

舖頭大約有廿款嘅關東煮食材，包括牛筋、牛小腸、牛脷、白蘿蔔、雞蛋、芋絲、赤蒟蒻、北海道薯仔、芝麻麵筋、炸魚餅等等。白蘿蔔索晒啲湯固然之清甜啦，牛筋都係㗎，仲要係用鹿兒島頂級和牛牛肉嘅肌腱部份，口感夠晒柔韌，滲出陣陣肉香。

牛魔牛冇可能唔點埋牛小腸同牛脷。前者相對薄身，柔滑脆口；後者就係厚切，但又唔使怕佢韌喎，煮完之後軟軟der，牛味醇香。

師傅仲利用呢個高湯，設計咗款高湯炊飯。米係日本山形縣出產嘅滋雅米，粒粒分明，唔係湯飯咁樣但又啖啖都飲到魚湯嘅清香。

另外，傳統鄉土料理土手燒都有得食，土手燒即係用味噌、料理酒或者味醂等，將牛筋長時間熬煮而成嘅料理，煮完之後啲牛筋柔韌彈牙，仲好多汁添。而牛小腸就好爽脆，好入味！

滑蛋雞肉(華味雞)、高湯蛋卷同樣都係加入咗高湯去製作，一樣清甜。

 和牛刺身

酒鬼睇到呢度實會問，點可能冇酒送？Yo，有多款燒酹選擇呀，其中特別推介呢三款，分別係蕃薯燒酹同麥燒酹，同關東煮幾夾呀。

和家
地址：銅鑼灣軒尼詩道499號永光商業大廈10樓
（留意返，淨係開夜晚咋，唔好日頭貢咗上去呀）

文、相：Kar