坐喺課室食台菜!尖沙咀新開懷舊主題餐廳(有片)
2018-01-26


而家揀餐廳唔單止要食美食,仲要食裝修。尖沙咀呢間台灣菜餐廳就啱哂各位大朋友同小朋友,皆因裝修以台灣課室為主題,有懷舊擺設仲有埋漫畫書。嘢食方面由惹味小食,台式滷味到得意包點都有,畀大家玩完再食,食完再瘋狂自拍!
 

台灣課室主題


一睇小食糖呢個懷舊裝修,心水清嘅朋友仔可能已經估到佢就係觀塘小時光嘅姐妹店。餐廳裡面嘅枱櫈全部都係嚟自台中同台南嘅小學同中學,就連上面嘅塗鴉都仲保留住喺度。
 


隔開用餐區同走廊嘅亦係店主搜集返嚟嘅舊門,最值得一提嘅係店裡面有漫畫免費借畀大家睇,部分黑板亦歡迎大家任畫,童心都立刻返哂嚟。
 

香口台式小食


酥炸甜不辣($35)

提到台灣美食,當然唔少得夜市嘅香口小食!餐廳選用台灣甜不辣,炸香後外脆內糯,加上甜甜地嘅味道,非常討好。
 


台式鹽水雞($50)

鹽水雞有好香胡椒粒嘅香味,食落啖啖肉。略嫌鹹味霸道咗啲,食唔出雞味。
 


酥炸廣島蠔($60)

炸蠔金黃飽滿,皮脆肉Creamy。值得一讃嘅係保留到蠔肉嘅鮮味,點埋沙律醬一齊食完全無油膩嘅感覺。
 

飽肚特色麵食


台南鹽水意麵套餐($68)

齋食小食唔夠飽,仲有唔少麵食選擇,全部都會配兩至三小碟蔬菜。呢個台南鹽水意麵套餐會配埋滷味拼盤,包括牛腱、滷蛋、豆干、蘿蔔、海帶同豬耳。台灣滷水鹹香有致,豬耳彈牙唔過硬,牛腱同蘿蔔都非常入味,相比起嚟豆干就未入哂味,要扣分。
 


而鹽水意麵其實即係加入鴨蛋製作嘅鹽水麵,麵條Q彈帶少少韌度,撈埋滷肉醬相信女孩子都可以輕鬆完食。
 



綜合水餃配貢丸湯($68)

綜合水餃口味有三款:高麗菜(椰菜)、韭菜同香菇雞肉,除咗韭菜香味比較濃之外,整體都係比較清淡,最啱想食Light啲口味嘅朋友。水餃細細粒Bite Size,要飽肚主要靠碗貢丸湯麵,麵條係手工麵,口感彈牙帶少少麵粉香。最抵讃嘅係浸咗一陣都無發生發脹或者過腍嘅情況。
 

台灣得意包點+台式特調飲品


(左)瑪莉大力菇($26),(右)小綠蝌蚪包($25)


輕食選擇仲有一系列台灣製造嘅得意造型包點,紅色嘅瑪莉大力菇裡面係番薯芝士夏威夷豆口味,小綠蝌蚪包係綠豆沙鹹蛋黃麻糬,軟腍麻糬增加口感層次。
 


(後左)小白龍貓包($28),(後右)小兔蹦蹦包($18),(前)小黑咻咻包($20)

而呢三款可愛包點分別係小紅莓奶酥、紅豆合桃,同花生餡料。
 


(左)小紫嘟嘟包($20),(右)瑪莉生命菇($26)


小紫嘟嘟包裡面係芋泥麻糬,瑪莉生命菇就係相當受歡迎嘅紅豆抹茶味。
 


黑糖珍珠奶茶($35)

最後介紹埋飲品,珍珠奶茶用實驗室器皿裝住夠玩味。一杯係黑糖奶茶,另一杯係自家製焦糖珍珠同冰,黑糖香味十足而且甜度適中,珍珠亦夠煙韌。
 


桂圓枸杞紅棗茶($48)

最近天氣轉涼,熱飲特別推介養生花茶系列,桂圓紅棗味道清甜,飲落特別滋潤。配嘅紅棗乾亦係甜而不膩嘅小食。
 


  

更多【新店直擊】:
1. 邊聽歌邊食椰子雞煲 四個椰青清甜湯底
2. 大阪過江龍肉食店 4吋高和牛山、鹿兒島黑毛和牛
3. 台灣滷水香直送到港!中環新開滷味店



小食糖
尖沙咀彌敦道132號美麗華廣場1期2樓206號舖




文、相、片:Cathy

關鍵字
尖沙咀
台灣菜
甜不辣
滷味拼盤
珍珠奶茶
懷舊
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-09-27
尖沙咀新商場開幕 過江龍餐廳一覽
2019-09-20
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19
幾時都要打邊爐!火鍋控必試特色店!
2019-09-24